Kopa AFTL 2026, AD Estrela Baguia Halakon Academica F.C ho Score 6-1

AD Estrela Baguia susesu halakon nia adversariu Academica F.C ho score fantastiku 6-1 iha jogu kontinuasaun Kopa Asosiasaun Futsal Timor Leste (AFTL) 2026 faze apuramntu grupu C, Domingu (31/05/2026). Imajen/AFTL

Díli, 31 Maiu 2026 (RAFA.TL)– AD Estrela Baguia susesu halakon nia adversáriu Academica F.C ho score fantastiku 6-1 iha jogu kontinuasaun Kopa Asosiasaun Futsal Timor Leste (AFTL) 2026 faze apuramntu grupu C.

Jogu entre ekipa rua ne’ebé hala’o iha Kampu Futsal Kuartel Jenerál  FALINTIL-Forsa Defeza Timor-Leste (F-FDTL), Domingu (31/05/2026), iha inísiu ekipa rua hatudu jogu furak, maibé ekipa AD Estrela Baguia ne’ebé mak haforsa hosi jogadór estranjeiru na’in-tolu hanesan Daud Mammau, Lucky Wili Here no Ardiansyah Kana, konsege domina liu jogu no halo bola hodi lansa sutu fila-fila ba rede Academica F.C.

Maske ekipa Academica F.C mai ho jogadór lokal, maibé konsege halo uluk golu surpreza liu husi kontra atake ne’ebé lais no konsege aproveita ho di’ak liu hosi jogadór Mariano da Costa hodi lori ekipa Academica F.C lidera provizoriu ho score 1-0.

Selebrasaun golu ekipa Academica F.C ne’e la dura to’o tempu naruk, tanba hakat ba iha minutu lima ekipa AD Estrela Baguia konsege responde  golu ida hodi halo empata ba score sai 1-1 liu hosi jogadór Ricardo Correia.

Ho score refere jogu kontinua manas liután ba ekipa rua ne’e hodi lansa kontra atake ba malu maibe to’o termina jogu priemeira parte la iha tan golu ruma mak akontese no score mantein 1-1.

Kontinua ba jogu segunda parte AD Estrela Baguia hala’o jogu ho agresivu liután hodi lansa atake ba ekipa Academica F.C no tama ba iha minutu 22 jogadór estranjeiru AD Estrela Baguia Lucky Wili Here konsege marka golu ida hodi lori nia ekipa lidera hikas ho score 2-1.

Liu deit minutu rua AD Estrela Baguia marka tan golu ida liu hosi asaun jogadór estranjeiru Daud Mammau hodi muda aumenta score sai ba 3-1.

Ho score refere halo ekipa AD Estrela Baguia domina liután bola hodi lansa atake ne’ebé lais no konsege produs tan golu-tolu tui-tuir malu liu hosi Rivaldo Maia iha minutu 32, Ricardo Correia iha minutu 35 no 39 hodi termina jogu segunda parte ho score 6-1 vitória ba AD Estrela Baguia.

Husi rezulatadu vitória ne’e hatuur ekipa AD Estrela Baguia iha pozisaun daruak ho pontu tolu  husi jogu rua manan ida no derota ida.

Entertantu, iha grupu C kompostu husi ekipa tolu mak hanesan AD Estrela Baguia, Coelho F.C no Academica F.C.

Jornalista : Davilio Valdameir/Editór: Vito Salvadór