Iwan Fals Sente Onra Bele Mai Timor no Hasoru PM Xanana

Iwan Fals hasoru malu ho PM Xanana Gusmão iha Palásiu Governu, Sesta (29/05/2026).

Díli, 29 Maiu 2026 (RAFA.tl)—Artista lendáriu husi Indonézia, Iwan Fals, sente onra boot bele mai Timor-Leste no hasoru lider nasionál, Xanana Gusmão.

Notísia Relevante: Artista Internasionál Sira Ba Festival TT TasiFest 2026 Orgullu ho Timor Nia Beleza Natural

Iwan Fals hamutuk ho artista internasionál seluk, hanesan dou Calema; Fradique Mendes Ferreira ho  António Mendes Ferreira husi São Tome e Prinsípe, Rui Orlando husi Angola  ho  Guy Sebastian husi Austrália, mai Timor-Leste hodi partisipa iha konsertu ka festival TT TasiFest 2026.

Artista instenasionál sira-ne’e  sei  hananu  iha festival TT TasiFest hodi anima Timoroan  iha Tasi-tolu, Sesta kalan (29/05/2026).

“Obrigadu tanba bele iha oportunidade hodi hasoru-malu ho Primeiru-Ministru, Xanana Gusmão ne’ebé simu ha’u iha ambiente amigável tebes. Ha’u tama iha mundu múzika durante tinan 50 nia laran, foin bá dala-uluk vizita Timor-Leste. Ha’u nia mehi ne’ebé sai duni realidade. Ha’u kontente loos iha ne’e,”  Iwan Fals hateten hafoin hasoru malu ho PM Xanana Gusmão iha Palásiu Governu.

Iwan Fals konsidera nu’udár artista lendáriu ida iha Indonézia no  Sudeste Aziatiku ne’ebé naran bo’ot tanba nia múzika sira la’ós de’it bá entretenimentu, maibé mós lori kritika sosiál no polítika ne’ebé forte-liu durante tempu Governu “Orde Baru” iha Indonézia.

Iwan Fals hahú nia karreira hosi hananu iha dalan (pengamen), depois sai íkon múzika Indonézia ho kanta sira hanesan: Bento, Guru Oemar Bakrie, Wakil Rakyat, Galang Rambu Anarki no seluk tán.

Festival  TT TasiFest nu’udar eventu ida hodi promove kultura Timor-Leste bá nível internasionál, hametin relasaun kulturál ho ASEAN no CPLP, atrai turizmu no fó plataforma bá artista timoroan hamutuk ho artista internasionál sira.

Jornalista: Remigia Locatelli