Kolaboradór Na’in-40 Husi Empreza Grupu ETO Termina Formasaun Kona-bá Kombate Inséndiu

Foto hamutuk hafoin enseramentu formasaun kona-Bá kombate Inséndiu.

Díli, 26 Maiu 2026 (RAFA.tl)- Kolaboradór na’in-40 husi Empreza Grupu Esperança Timor Oan (ETO) termina formasaun kona-bá kombate inséndiu ne’ebé fasilita husi Sekretáriu Estadu Protesaun Sivíl (SEPS), liu husi Autoridade Protesaun Sivíl (APC).

Formasaun durante loron rua; Segunda-Tersa (25-26/05/2026), hala’o iha edifísiu Torreto, Mandarin, Díli.

Formadór husi APC, Urbano Venansio Belo ba Rafa.tl esplika durante loron-rua ne’e formandu sira aprende matéria sira kona-bá intervensaun kontra inséndiu, oinsá sira atu utiliza fire stinger atu hamate ahi ne’ebé mosu, no mós kompleta formandu sira nia komprensaun kona-bá tipu distritor sira entre klase ahi nian.

Nia informa, matéria ida ne’e espesiál liubá formadu sira ne’ebé maka mai husi postu abastesimentu kombustivel sira grupu empreza ETO nian, hodi bele hakle’an sira nia koñesimentu bainhira mosu inséndiu ruma iha estasaun kombustível hodi sira bele iha kbiit prevene no kombate.

‘’Bainhira akontese inséndiu ruma karik oinsá sira bele resposta sedu depois oinsá sira bele halo koordenasaun liu husi númeru emerjénsia sira ba parte relevante hanesan ekipa Bombeiru,’’ Urbano Venansio Belo hateten.

Nia haktuir, formandu sira mós aprende matéria kona-bá primeiru sokoru báziku, no mós treinamentu kona-bá pesoal balu ne’ebé karik hetan asidente ruma iha servisu fatin, oinsá funsionáriu ida  atu salva ema seluk nia vida bainhira fuan para ka la dada iis, sira bele halo atuasaun.

Tuir lolós formasaun ida ne’e tenke kompleta loron tolu liu, tanba haré mós ekipamentus sira iha edifísiu Torreto liu-liu hanesan fire house no mós iha vokadim inséndiu presiza mós treinamentu hodi nune’e hasa’e funsionáriu sira nia koñesimentu kona-bá funsaun husi ekipamentu sira ne’e.

Iha fatin hanesan, Asistente Operasionál husi Empreza Grupu ETO, Jaime Guterres da Silva informa, formasaun ida ne’e importante liu ba formandu sira liu-liu ba sira ne’ebé maka servisu iha postu kombustível sira, bainhira akontesimentu inséndiu ruma sira bele halo atuasaun lalais liu husi prátika sira ne’ebé maka durante ne’e sira aprende husi autoridade protesaun sivíl no mós ekipa bombeirus

‘’Treinamentu ida ne’e fó valor ne’ebé di’ak ba kolega sira ne’ebé atesta mina ba ita nia kliente sira, se bainhira akontese ahi-han ita nia bomba gasoliña ruma, ita presiza maka atu atende primeiru sokoru ho meius hamate ahi,” Jaime Guterres da Silva hateten.

Nia haktuir, karik ema ruma hetan dezastre iha postu kombustível ruma, primeiru sokuru ne’e maka bele salva uluk sira nia vida, no mos bele kontaktu lalais ba parte relevante sira hodi bele transporta ba iha parte médiku nian.

Autoridade Protesaun Sivíl realiza formasaun ida ne’e ba kolaborador sira empreza grupu ETO, ne’e tanba ETO mós hanesan instituisaun ida ne’ebé prense mos rekezitu husi Autoridade Nasionál Petróleu no Minarais.

Durante loron rua ne’e formandu sira tuir formasaun kompleta kedas ho prátika no mos teoria ka simulasaun iha aredór edifísiu Torreto.

Antes ne’e, APC realiza ona formasaun ne’ebé maka ho tema hanesan iha Postu kombustível Empreza Grupu ETO nian iha Hera no tinan ida ne’e  formasaun ba dala-tolu ba funsionáriu sira iha empreza Grupu ETO nian iha Timor-Leste.

Jornalista: Remigia Locatelli/Editór: Vito Salvadór