PNTL Detein Joven Na’in-10 Suspeita Kazu Omisídiu iha Aldeia Poros

Suspeitu sira ne'ebé envovle iha kazu omisídiu iha Aldeia Poros, Suku Mehara, Postu-Administrativu Tutuala, Munisípiu Lautem. Foto/dok.

Díli, 11 Maiu 2026 (RAFA.TL)- Polísia Nasionál Timor-Leste (PNTL), liu husi Polísia Eskuadra Tutuala detein joven na’in-10 inklui membru Falintil-Forsa Defeza Timor-Leste (F-FDTL) na’in-ida, ne’ebé suspeita ba  kazu konfrontu  to’o rezulta Vicencio de Jesus Fernandes lakon vida tanba hetan agresaun fizika.

Kazu omisídiu ne’e akontese iha Sábadu, 09 Maiu 2026, iha Aldeia Poros, Suku Mehara, Postu-Administrativu Tutuala, Munisípiu  Lautem.

Porta-voz Komandu Jerál PNTL, Superintendente Xefe João Belo dos Reis ba Jornalista sira iha Komandu Jerál PNTL, Segunda (11/05/2026) hatete, insidente ne’e akontese matebian ho família sira ba partisipa serimónia kultural iha Mehara, Postu Administrativu  no hetan asalta husi grupu balun ikus mai rezulta Vicencio de Jesus Fernandes lakon vida no Reinaldo Rivaldo Lopez hetan kánek.

Hafoin akontesimentu ne’e, Komandu PNTL Munisípiu Lautém hamutuk ho F-FDTL halo kedas atuasaun hodi kaptura no detein joven na’in-10 inklui membru F-FDTL ida iha fatin lokál krime.

João Belo dos Reis afirma, liga ho kazu ne’e Komandu PNTL Munisípiu Lautém rejista ho númeru úniku krime (NUC), 0028/2026 tanba kabe ba suspeitu sira nia asaun krime ne’ebé kontra artigu 140, 145, 146, 185 no 260  hanesan omesídu agravadu.

Polísia halo ona detensaun ba suspeitu na’in-10  iha sela Komandu PNTL Munisípiu Lautém hodi Kumpri oras 72 molok aprezenta ba Ministériu Públiku atu halo prosesu.

Jornalista: João Carlos/Editor: Vito Salvadór