ETO Selebra “May Day” ho Reflesaun no Halibur Kolaboradór Liu Na’in-500

Grupu Empreza ETO selebra loron mundiál traballadór (may day) hodi halibur kolaboradór (taballadór) liu ema 500 hodi halo reflesaun kalan hamutuk iha parke fabrik KTON iha Glenu, 09 Maiu 2026.

Gleno 09 Maiu 2026 (RAFA.TL)- Grupu Empreza Esperança Timor Oan (ETO) selebra loron mundiál traballadór (may  day) hodi halibur kolaboradór (taballadór) liu ema na’in-500 hodi halo reflesaun kalan hamutuk.

Notísia Relevante: Prezidente Repúblika Parabeniza Nilton Gusmão Ba Investimentu Parque Industriál ETO iha Manatuto

Loron mundiál traballadór kada tinan hala’o iha loron 01 fulan-Maiu, maibé empreza grupu ETO deside selebra hamutuk iha loron 09 fulan-Maiu, konsentra iha resintu fabrika KTON iha Urluli, Postu Administrativu Gleno, Munisípiu Ermera, ho tema,  Kumpri o nia dever nu’udar traballadór mak xave importante ba dezenvolvimentu nasaun no ekonómia família “Ho Esperansa sei laha mate mehi ba futuru”.

CEO ETO, Nilton Telmo Gusmão dos Santos, iha nia intervensaun  husu kolaboradór hotu ativu atu servi públiku ho responsabilidade no onestidade hodi oferese servisu ida kualidade ho marka ne’ebé grupu esperansa iha.

Nilton Gusmão hato’o parabéns ba kolaboradór sira hotu ne’ebé maka hamahan aan iha empreza grupu ETO atu kuda espíritu onestidade iha grupu ne’e nia laran, uza tempu servisu ho di’ak, onestu iha atitude ho onestu iha dezempeñu servisu lor-loron.

Nia enkoraza kolaboradór hotu iha empreza ETO tenke orgullu tanba ida ne’e la’ós deit empreza no atividade administrativa de’it ne’ebé atu heré hamutuk, maibé ida ne’e produz ona buat balu atu komplementa merkadu nasionál hodi hatan ba nesesidade merkadoria no hakonu komunidade sira nia konsumu nasionál.

“Hanesan Timoroan tenke iha mehi ba Timoroan, no fiar katak esperansa nunka bosok. Grupu ida-ne’e ita iha vizaun, ita iha objetivu ida ne’ebé klaru no ita iha esperansa. Iha ha’u nia moris lor-loron iha buat tolu deit maka ha’u kuda iha ha’u nia aan, maka Mehi, Esperansa no Onestidade,” Nilton Gusmão hateten.

Nia  dezafia kolaboradór sira, labele tauk atu mehi halo buat ruma tanba liu husi mehi maka bele orienta ita atu to’o iha ne’ebé deit, maibé atu to’o iha mehi tenke iha esperansa ne’ebé maka boot.

CEO grupu empreza ETO  ne’e haktuir kolaboradór sira tenke kontinua diversifika ba atividade barak liu tan hodi kontinu hakle’an kampu servisu ba Timor oan sira hotu, tanba númeru dezempregu iha Timor-Leste sei iha aas nafatin. Tanba ne’e, empeza ETO grupu organiza husi Timor oan ba Timor oan tanba iha Esperansa ba Timor oan sira.

Nia afirma objetivu boot liu ne’ebé maka ETO halo maka hanesan parke ne’ebé maka harii tiha ona iha Munisípiu Manatuto  ne’ebé sei akumula tan traballadór Timor oan 1.000 to’o iha 1.500, maibé ida-ne’e seidauk, tanba alvu ba empreza ETO katak tenke oferese tan kampu traballu ba Timor oan sira husi tinan 2026-2033, tenke to’o iha 7.000.

“Ha’u nia mehi to’o iha 2033 ita tenke iha pelumenus fó oportunidade serivsu ba Timor oan  entre na’in-6.000 to’o 7.000 ne’ebé servisu iha grupu ETO,” Nilton Gusmão hateten.
Iha selebrasaun ne’e mós CEO ETO agradese mós ba fundasaun ETADEP ne’ebé uluk lidera husi CEO ETO nia aman rasik, Saudozu Gilman  Asucenção Exposto dos Santos,  ne’ebé maka sai hanesan kliente dahuluk no fó fundus ba empreza ida ne’e hodi hahú atividades sira husi inisiu to’o ohin loron bele diversifika ona  iha setór oi-oin.

Iha selebrasaun ne’e mós empreza grupu ETO  atribui premiu ba empreza subsidiráriu sira ne’ebé sai manan nain ba iha kompetisaun desportu , Fulsal no halai-karon ho grupu dansa konvensionál  ho osan montante $2000 ba iha manan nain dahuluk feto no mane inklui trofeu ho medalla (futsal) mo mós manan na’in daruak ho osan montante $1500 inklui trofeu ho medalla .

Enkuantu kompetisaun halai-karun manan nain dahuluk ho osan montante $250, manan nain daruak $200 no manan nain datoluk ho osan montante $150.

Ba iha kompetisaun dansa konvensional, manan nain dahuluk ho osan  montante $200, manan nain daruak osan montante $150 no mos manan nain datoluk osan montante $100.

Empreza grupu ETO atribui  mós premiu apresiasaun ba mellór kolaboradór  iha empreza subsidiáriu idak-idak ba sira ne’ebé maka durante ne’e dezempeña servisu di’ak liu ho  lembransa ida ba sira inklui osan ho montante $250  ba kada pesoal ne’ebé konsidera mellor kolaboradór tinan 2025.

Nilton Gusmão, CEO ETO mós hato’o agradese ba nia espoza Cidália dos Santos no mós ekipa komisaun organizadora sira ne’ebe organiza serimónia reflesaun hamutuk hodi komemora loron mundiál traballadór ba kolaboradór hotu ne’ebé sai mahan iha empreza grupu ETO.

Kolaboradór liu na’in-500 ne’ebé partisipa iha selebrasaun ne’e husi empreza subsidiáriu  grupu ETO ninia hamutuk 16 mak hanesan ETO Moving, G&S konstrusaun sivil, GOTA, Santos Living, Detile, D’City Hotel, ETO-TELCO (Rafa no NTV), ETO Gas, VIP Gas, ETO the avitation servise kompany, KTON, ETO E&P, Nine Aparel, Ti-Oan Fintech, Hotel Timor no Supernine.

Iha serimonia família boot grupu empreza ETO nian ne’e  pastisipa mós husi Prezidente Autoridade Munisípiu Ermera, José Martinho dos Santos Soaresa,  Autoridade Posto Administrativu Railaco, Micaela dos Santos Soares, inklui mós Komandante Polísia Nasionál Timor-Leste (PNTL), Superintendente Xefe Polísia Ludgerio Picancio Madeira Lay ho mós  Polísia Postu Railaco.

Jornalista: Remigia Locatelli/Editór: Vito Salvadór