Arguidu Sira Ba Kazu Jogu Online iha Zita Plaza ho Colmera Tenta Halai Husi TL

Polísia lori bis ho arguidu na'in-11 ba kazu jogu online ne'ebé tenta halai sai husi Timor-Leste ba Indonézia liu husi fronteira terrestre Suai.

Díli, 01 Maiu 2026 (RAFA.tl)-Arguidu na’in-11  ne’ebé envolve iha kazu jogu online iha Zita Plaza ho Colmera iha tinan 2025, tenta halai sai husi área jurisdisaun Timor-Leste atu ba Indonézia.

Notísia Relevante: PNTL Halo Buska no Apreensaun Ba Operadór Jogu Online Rua iha Dili no Detein Sidadaun Estranjeiru na’in-10

Arguidu na’in-11 maioria sidadaun estranjeiru ho nasionalidade Xina utiliza  matadalan Timoroan ida aluga bis dirasaun Díli-Suai atu halai sai husi área fronteira terrestre   Suai nian ba Indonézia, maibé to’o iha área Kassa, Munisípiu Ainaro nian, autoridade Polísia Nasionál Timor-Leste (PNTL) Munisípiu Ainaro halo auto stop konsege deteta arguidu sira no halo kedas atuasaun no detensaun ba ema hirak ne’e.

Arguidu sira ne’e hetan ona medida koasaun aprezentasaun periódika husi Tribunál Judisiál Primeira Instánsia Díli (TJPID) iha fulan-Outubru tinan 2025 tanba envolve  ativa iha jogu online ne’ebé opera iha Zita Plaza ho Colmera.

“Kuandu ami simu informasaun husi ita-nia ekipa servisu sekreta sira, ha’u orienta kedas parte eskuadra hamutuk ho Polísia Tránzitu halo auto stop  atu bele deteta sidadaun estranjeiru na’in-11 ne’ebé atu ba   Suai hodi hakat liu fronteira ba Indonézia,”  Komandante PNTL Munisípiu Ainaro, Superintendente Xefe Polísia Emilio dos Santos, haktuir ba jornalista sira, Sesta (01/05/2026), iha Kuartel Jerál PNTL, Díli.

Operasaun auto stop ne’ebé hala’o iha Kinta, 30 Abríl 2026,  hale’u tuku 16:00 Otl, konsege hapara bis ida no identifika sidadaun estranjeiru sira iha bis laran husi Díli atu ba Suai.

Superintendente Xefe Polísia Emilio dos Santos, informa iha bis laran ne’e hamutuk ema na’in-16, iha motorista, ajudante no mós matadalan ba sidadaun estranjeiru na’in-11 ne’e atu fasilita sira hakuur fronteira terrestre liu husi Suai ba área jurisdisaun Repúblika Indonézia.

“Ami transporta ona arguidu sira ne’e mai Díli hodi entrega  ba autoridade Diresaun Servisu Investigasaun Kriminál (DSIK) atu halo indeintifkasaun,”  Superintendente-Xefe Polísia Emilio dos Santos informa.

Carlos da Costa nu’udar motorista ne’ebé kondus bis hodi transporta arguidu sira ne’e konfesa katak, nia hetan kontaktu husi  matadalan, Suai oan ida, dehan aluga bis ho montante US$200.00 hodi transporta ema estranjeiru sira. Maibé, nia rasik la hatene katak ema sira ne’e iha problema ho justisa ka sai arguidu ba kazu jogu online iha tinan 2025.

Carlos da Costa kondus bis ba tula ema na’in-11 inklui matadalan ne’e iha área Manleu, besik Kapela Lisbutak, Díli, hale’u tuku 09:00 dadeer Otl, atu lori ba Suai ho kontratu aluger US$200.00.  Maibé, to’o iha área Kassa-Ainaro,  tuku 15:30 Otl,  hetan apreensaun husi Polísia Tránzitu sira.

Iha atuasaun polísia nian ne’e, asegura mós evidénsia sira, hanesan telefone (handphone) 20, laptop-tolu, pasaporte ida, speaker ida no motór scoter ida.

Iha Kinta-kalan, 09 fulan-Outubru 2025, hale’u tuku 23:00 Otl, Polísia halo  operasaun iha Zita Plaza no mós  iha Colmera nian hodi detein suspeitu na’in-10 tanba kontinua loke atividade jogu online ne’ebé Governu bandu ona.

Iha operasaun ne’e,  Polísia rekolla prova sira iha  parte Zita Plaza nian, mak hanesan  telefone  Readmi, Realmi, Xiomi hamutuk 68, tablet ida, laptop lima, kartaun sim Telemor 521, Telkomcel 375.

Iha parte jogu online Colmera  nian mós konsege rekolla evidénsia sira hanesan laptop rua, telefone 34,  no aparelu sira seluk tan ne’ebé iha relasaun ho atividade jogu online.

Jornalista: Elio dos Santos/Editór: Vito Salvadór