Grupo ETO Parabeniza no Fó Rekoñesimentu Ba Susesu Boot Husi Delegasaun Timor-Leste iha Konkursu Internasionál ICIA 2026

Manan na'in sira reprezenta Timor-Leste iha kompetisaun inovasaun internasionál (ICIA/ International Creativity and Innovation Award 2026) iha Kambodia. Imajen/Espesiál

Díli, 29 Abril 2026 (RAFA.tl) – Grupo empreza Esperança Timor Oan (ETO) hato’o parabéns ho ksolok boot ba estudante, profesór no eskola, timoroan sira hotu ne’ebé reprezenta Timor-Leste iha International Creativity and Innovation Award (ICIA) 2026, ne’ebé hala’o iha Phnom Penh, Kamboja, entre  loron 24 no  loron 26 fulan-Abrîl 2026.

Notísia Relevante: Estudante EBC Santu António Baucau Hetan Grand Award no Titanium Award iha Kompetisaun ICIA 2026 iha Kambodia

Rezultadu sira ne’ebé sira hetan hanesan momentu istóriku ida ba edukasaun Timor-Leste, hatudu katak ita-nia joven sira iha kapasidade atu konkore iha nivel internasionál.

Grupo ETO sente orgullu boot liu tanba bele apoia eskola CEBC St. António Teulale husi Baucau, bele tuir kompetisaun ne’e iha faze direta. Apoi ne’e hanesan parte husi kompromisu Grupo ETO atu kontinua investe iha edukasaun no fó oportunidade ba joven Timoroan sira atu hatudu sira-nia talentu iha mundu internasionál.

EBC St. António Teulale sai hanesan eskola ne’ebé hetan rezultadu extraordináriu liu iha kompetisaun ne’e, inklui Grand Award (premiu aas liu iha ICIA), Titanium Award, no mos Top 10 Challenge ho projetu inovadór “Statistics from Recycling”. Eskola ne’e mos manán Medalha Bronze ho projetu segundu ne’ebé liga matematika ho kultura Timoroan liu husi tais.

“Rezultadu ida ne’e halo ami kontente teb-tebes. Ami apóia eskola ida ne’e tanba ami fiar katak talentu Timoroan iha nivel mundial. Ohin, ita haré katak, ho apóiu no oportunidade, ita-nia joven sira bele atinji rezultadu aas liu,”  Nilton Gusmão, Diretor Ezekutivu Grupo ETO hateten.

Grupo ETO mós hato’o parabéns ba eskola sira seluk ne’ebé hetan prémiu, inklui EBC Dom Baumeta (Aileu), ESGP N.º 1 Baucau, ESGP N.º 1 Liquiça, ESGP 4 de Setembro Viqueque, ESGP Finantil Díli no EBC 3 Fatumeta (Díli). Parabéns especial mos ba profesóra Zélia Alves da Cruz, ne’ebé hetan Grand Award Top 3 “Teach Me Award”, tanba nia kontribuisaun boot iha ensinu.

“Rezultadu sira ne’e la mosu de’it. Sira mak rezultadu husi servisu di’ak, dedikasaun boot husi profesór, estudante no família sira iha Timor-Leste tomak. Grupo ETO sei kontinua apóia edukasaun hanesan baze importante ba futuru nasaun nian,” Nilton Gusmão subliña.

Grupo ETO reafirma nia kompromisu atu kontinua investe iha edukasaun, apóia projetu inovadór no fó oportunidade ba joven Timoroan sira atu bele kontinua hasa’e sira-nia kapasidade no hatudu Timor-Leste iha palku internasionál.

Jornalista: Remigia Locatelli/Editór: Vito Salvadór