Polísia Halo Buska Ba Armajen Y&W Hetan Osan Falsu Millaun Haat-Resin

Polísia asegura osan falsu dollar amérikanu millaun haat-resin hafoin buska iha armajen Y&W iha área Bidau, Díli, Kuarta (15/04/2026).

Díli, 15 Abríl 2026 (RAFA,tl)  –Ekipa  Diresaun Servisu  Investigasaun Kriminál husi Polísia Nasionál Timor-Leste (PNTL), Kuarta (15/04/2026), ezekuta mandadu buska husi Ministériu Públiku (MP) ba armajen Y&W iha Bidau, Díli, no deskobre ka hetan osan falsu ho montante millaun haat-resin dollar amérikanu.

Mandadu Ministériu Públiku nian ho Númeru Úniku Krime (NUC) 0138/26-PNSIC fó forsa legál atuasaun DSIK nian hodi deskobre duni osan falsu (osan tahan) dollar amérikanu millaun haat-resin hatama  iha books ne’ebé tau iha kaixa laran ho barankas lima.

Armajen Y&W ne’e lokaliza iha Aldeia Sagrada Família, Suku Bidau Santana, Postu Administrativu Cristo Rei, Munisípiu Díli, no iha buska ne’e Polísia detein kedas suspeitu sira nu’udar sidadaun estrenjeiru na’in-haat, kompostu husi na’in-tolu  ho nasionalidade Xina no na’in-ida seluk nasionalidade Indonézia.

Tuir observasaun Rafa.tl nian katak osan falsu  millaun haat-resin dollar amerikanu ne’e maioria osan tahan US$100.00 no deskonfia totál osan falsu iha kada pakote  US$30,000.00 tau iha bangkas boot.

Polísia halo tiha buska no apreensaun ne’e  lori kedas evidénsia  osan falsu no asegura sidadaun sidadaun estranjeiru na’in-haat nu’udar taballadór iha ba loja no armajen  Y&W hodi ba halo indentifikasaun no submeter ba investigasaun iha edifísiu Diresaun Servisu Investigasaun Kriminál iha Kuartel Jerál PNTL.

Komandante Jerál PNTL Komisáriu Asistente Polísia Afonso dos Santos no Segundu Komandante Jerál, Komisaria Asistente Polísia Natércia Eufrasia Soares Martins, tuun dereta  haré  prova sira ne’ebé DSIK rekolla iha busk aba armejn Xinés nian Y&W.

Komandu Jerál PNTL liu husi Komisáriu Asistente Polísia Afonso dos Santos no Segundu Komandante Jerál PNTL, Komisaria Asistente Polísia Natércia Eufrasia Soares Martins  hato’o apresiasaun  ba servisu DSIK nian ne’ebé bele deskobre no asegura osan falsu ho montante boot.

Komandu Jerál PNTL Komisáriu Asistente Polísia Afonso dos Santos, fó  mós orientasaun ba DSIK kontinua buka tuir nafatin fatin balun ne’ebé rai osan falsu.

Jornalista: João Carlos/Editór: Vito Salvadór