Aero Díli Suspende Provisória Voo Ba Singapura ho Fuzhou-Xina

Aero Dili

Díli, 09 Abríl 2026 (RAFA.tl)- Diretór Ezekutivu Aero Díli, Lourenço de Oliveira,  Kinta (09/04/2026), informa Aero Díli suspende provisória voo husi Timor-Leste ba Fuzhou-Xina ho Singapura, inklui hamenus voo sira ba nasaun balun hanesam Malázia no Xiamen-Xina.

Notísia Relevante: Ramos-Horta Ofisialmente Inaugura Voo Dahuluk Aero Díli Ba Kuala Lumpur

Nain ba empreza Airline Aero Díli ne’e argumenta katak sira-nia parte hili suspende no hamenus rute voo sira balun ba nasaun sira ne’e tanba kauza husi funu iha Médiu Oriente ne’ebé halo foin kombustível mundiál sae maka’ás.

Hafoin hasoru malu  Prezidente Repúblika JoséRamos-Horta iha Palásiu Prezidensiál, Lourenço de Oliveira, konfirma situasaun atuál ne’ebé dezafiante no mundu agora iha hela krize boot ne’ebé mak ema hotu hetan tanba impaktu husi funu iha Médiu Oriente ne’ebé halo folin mina sa’e. Nune’e, Aero Dili tenke taka rute balun hanesan Singapura ho Fuzhou-Xina hodi haré situasaun normal mak bele semo fali.

Iha fatin balun mós diminui, tuir lolos bele semo dala tolu ba haat, maibé sei semo ba dala ida de’it.

“Ha’u hapara nasaun rua, restu ne’e ha’u diminui nia voo sira hanesan ba dala-tolu, ha’u halo ba dala-ida de’it, Malázia sei ba dala -ida de’it, Xiamen-Xina ha’u sei ba dala-ida, Indonézia sei ba dala-rua ka tolu de’it depende ba volume pasajeiru,” Lourenço de Oliveira konfirma.

Na’in ba Aero Díli ne’e haktuir, kona-ba tikete nia parte hare de’it mina sae ba 90 % entau sei konta hotu to’o iha ne’ebé mak sira bele hasae tikete ne’e, sira hasae 20-30 % hahú husi folin ida uluk. Provizoriu tikete agora US$250.00 Díli-Denpasar, no uluk ho folin US$220.00 no  US$ 217.00 Díli-Denpasar.

Nia haktuir kona-bá voo ba Darwin-Austrália  iha ona konsensus ne’ebé sei semo semana ida dala-ida de’it, tanba haré ba situasaun ne’ebé empreza hasoru kauza husi situasaun globál ne’ebé iha.

Iha sorumutu ne’e Prezidente Repúblika husu kona-bá oinsa mak governu fó nia apiu, nain ba empreza Airline Aero Dili ne’e esplika katak antes ne’e nia hasoru malu ona ho Ministru Transporte no Komunikasaun haré katak governu hakarak duni suporta empreza nasionál, ne’ebe kontente no haré rasik Primeiru-Ministru hakarak duni atu ajuda emprezariu nasionál tanba ne’e hanoin ba oin sei serbisu maka’ás liután bele ajuda no kontribui ba Timor-Leste.

Aviaun Aero Dili semo dahuluk mai Timor-Leste iha loron 20 fulan-Marsu tinan 2023. Dau-daun ne’e atende ruta internasional ba nasaun lima mak hanesan Indonézia (Denpasar), Singapura, Xina ( Xiamen) no planu ba Fuzhou, Maláyzia ba Kuala Lumpur foin lansa iha  loron 28 Marsu 2026 no planu rute foun ba Darwin- Austrália.

Jornalista: Elio dos Santos/Editór: Vito Salvadór