PNTL Sei Halo Rekrutamentu Foun Hodi Troka Membru Sira Ne’ebé Tama Ona Idade Reforma

Segundu Komandante Jerál Polísia Nasionál Timor-Leste (PNTL), Komisária-Asistente Polísia Natércia Eufrásia Soares Martins.

DÍLI, 07 Abríl 2026 (RAFA.tl)- Segundu Komandante Jerál Polísia Nasionál Timor-Leste (PNTL), Komisária-Asistente Polísia Natércia Eufrásia Soares Martins, Tersa (07/04/2026), informa Komandu Jerál PNTL prepara ona planu rekrutamentu kadete Polísia foun hodi troka membru sira ne’ebé tama ona idade reforma.

Notísia Relevante: Ministériu Interiór Hein Komandu Jerál PNTL Aprezenta Lista Membru Ne’ebé Tama Idade Reforma

Komisária-Asistente Polísia Natércia Eufrásia Soares Martisn, ba jornalista sira iha Kuartel Jerál PNTL, Díli, hateten Ministru Interiór Francisco da Costa Guterres, pronúnsia  ona no hein Komandu Jerál aprezenta lista membru sira ne’ebé tama ona idade reforma, tanba ne’e Komandu Jerál PNTL ona hanoin katak sei halo mós planu oinsá bele iha rekrutamentu hodi kobre númeru ne’ebé sei ba reforma.

“Internalmente Komandu Jerál PNTL sei halo avaliasaun ba nesesidade depois hetan tiha ninia finalidada mak  foin bele deside katak bainhira mak sira reforma no rekrumentu foun mós tenke lao dadaun ona para bele troka sira  refroma ne’e nia fatin,” Natércia Eufrásia Soares Martins informa.

Segundu Komandante Jerál PNTL ne’e informa planu iha tinan ida ne’e sei loke vaga Polísia nian ba joven sira. Maibé seidauk bele ko’alia ninia kalendáriu klaru tanba ida ne’e sei liga mós ho avaliasaun nesesidade Komandu Jerál PNTL nian mas espera  iha tinan ida ne’e tenke halo rekrutamentu foun.

“Bainhira identifika ona númeru fiksu membru sira ne’ebe atu reforma hafoin bele halo  proposta ba governu halo rekrutamentu,” nia tenik.

Tuir Dekretu-Lei Nú. 35/2024, kona-bá Estatutu Polísia Nasionál Timor-Leste iha  artigu  63 (Limite Idade)

1. Ofisiál diritente no superior sira limite idade tinan-60
2. Ofisiál subaltern no sarjentu sira limite idade tinan-58
3. Ajente sira limite idade tinan-56.

Iha mós artigu 65  ( Situasaun Aprezentasaun nian) iha númeru 3 haktuir Polísia, karik kumpri hela prazu kona-bá  garantia ne’ebé prevee tiha ona iha Lei Jerál, pasa tiha ba situasaun aprezentasaun nian bainhira de’it mak nia prienxe rekizitu hirak nu’udar tuir mai ne’e;

1. Karik atinje ona tinan-62 iha kazu Ofisiál Dirijente no Superiór  sira ka sira ne’ebé ho tinan-60 ho kazu hirak seluk-seluk;
2. Mak julgadu fizika ka psikikamente inkapáz hodi hala’o ezersísiu funsaun sira PNTL nian, liu husi Órgaun Kompetente omologadu ho Komandante-Jerál nian.

Jornalista: João Carlos/Editór: Vito Salvadór