Ekipa Integradu Submete Ona Kandidatu PAM-RAEOA Na’in-haat Ba PM Xanana

Monumentu Lifau. Imajen/exploringtimor.com

DÍLI, RAFA.tl—Ekipa Integradu ne’ebé durante ne’e halo avaliasaun  no konsultasaun  kona-bá servisu  estrutura tranzitóriu Rejiaun Administrativu Espesiál Oé-Cusse Ambeno (RAEOA) nian submete ona lista naran Prezidente Autoridade Munisípiu (PAM) RAEOA  nian hamutuk kandidatu na’in-haat ba Primeiru-Ministru (PM) Kay Rala Xanana Gusmão atu nomeia iha tempu badak.

Notísia Relevante: Governu Sei Define Modelu Organizasaun Foun Ba Servisu no Kargu Diresaun ho Xefia iha RAEOA

Ekipa integradu ne’ebé durante ne’e servisu halo avaliasaun no konsultasaun ba estrutura tranzitóriu RAEOA ne’ebé lidera husi Régio da Cruz Salu, mai husi Ministériu Finasas,  Ministériu Administrasaun Estatál, Ministériu Obras Públikas ho Komisaun Funsaun Públika (CFP, sigla portugés).

Informasaun ne’ebé Rafa.tl asesa husi fonte sira Komisaun Integradu nian katak naran figura potensiál Oé-Cusse oan na’in-haat ne’ebé Komisaun Integradu submete ba Primeiru-Ministru Xanana Gusmão atu nomeia ba PAM-RAEOA mak hanesan;   José Anuno, Constáncio Suni, Erkulanu Sousa ho Régio da Cruz Salu.

Husi sira-na’in haat ne’e, Primeiru-Ministru Xanana Gusmão sei uza nia kompeténsia atu nomeia na’in-ida ba Prezidente Autoridade Munisípiu (PAM) RAEOA tuir estatutu foun ne’ebé Governu sentrál sei deside liu husi reuniaun Konsellu Ministru.

Husi sira na’in-haat ne’e, na’in ida sei nomeia ba PAM RAEOA, na’in-ida sei nomeia ba Sekretáriu Munisipál Administrasaun Planeamentu, Investimentu no Dezenvolvimentu Integradu  no na’in-ida tan sei nomeia ba Sekretáriu Munisipál ba  Asuntu Sosiál no Organizasaun.

Informasaun seluk husi fotes balun iha RAEOA mós hateten posivel boot Ministru Administrasaun Estatál, Tomas do Rosário Cabral iha rasik nia preferénsia ba pozisaun PAM-RAEOA nian, maibé to’o agora seidauk iha naran ruma ne’ebé Ministru Tomas Cabral submete hamutuk ho lista ekipa integradu nian.

Fó hanoin fali katak mandatu autoridade tranzitóriu RAEOA nian, ne’ebé lidera husi Prezidente Autoridade, Régio da Cruz Salu termina ona iha loron 31 fulan-Marsu tinan 2026, hafoin hala’o funsionamentu administrasaun durante fulan-hitu (7), hahú husi loron 01 fulan-Setembru tinan 2025.

Atu garante funsionamentu administesaun RAEOA nian, iha loron 26 fulan-Fevereiru tinan 2026, Ministru Administrasaun Estatál (MAE), Tomas do Rosário Cabral, hasai karta ofisiál  hodi hato’o ba PA-RAEOA atuál Régio da Cruz Salu, ho asuntu “kontinuidade ba funsaun Ditetór sira Rejionál nian” tuir kompeténsia ne’ebé prevalese iha Dekretu-Lei Nú.1/2026, loron 02 fulan-Fevereiru, katak diretór rejionál sira iha RAEOA mantein sira-nia pozisaun servisu to’o desizaun tuir mai husi autoridade tutela.

Karta ofisiál ho númeru referénsia 153/M.MAE/II/2026, haruka mós kopia ka koñesimentu ba Primeiru-Ministru, Kay Rala Xanana Gusmão.

Estrutura  tranzitóriu RAOA nian ne’ebé simu posse husi Governu sentrál iha loron 01 fulan-Setembru tinan 2025 ho mandatu to’o 31 fulan-Marsu tinan 2026,  kompostu husi:

• PA-RAEOA, Régio da Cruz Salu
• Domingos Punef, Diretór-Jerál Rejionál
• José Tanessib Anuno, diretór administrasaun,
• Augusto de Fátima Efi, diretór planeamentu no aprovizionamentu,
• Amâncio Aguido Punef, diretór finansas
• Merita Marques Caunan Lafo, diretora rejionál saúde
• Vicêncio Cono diretóra rejional Edukasaun no Solidariedade Sosiál
• José Oki diretór agrikultura
• Orlando Quelo rdiretór rejionál área Komérsiu no indústria
• Remígio Nuno Sila diretór rejionál ba  área Infraestrutura
• Domingos de Almeida, diretór rejional ba asuntu  Transporte no Komunikasaun
• Carlos de Fátima de Almeida, diretór rejional ba asuntu juventude no desportu
• Anastásia Eni diretóra turizmu, arte no kultura
• José Ase Neno Colo diretór terras no propriedade
• ]Herculano de Sousa, koordenadór Implementasaun Zona Ekonómika Espesiál Dezenvolvimentu Oé-cuse Ambeno (ZEEDOA).

Jornalista: Elio dos Santos/Editór: Vito Salvadór