Ministru Francisco Guterres: “Ha’u Mak Hasai Despaixu Demoradu Ba Promosaun Diviza Julia da Gama”

Ministru Interiór (MI), Francisco da Costa Guterres. Imajen/Rafa.tl

DÍLI, RAFA.tl– Ministru Interiór (MI), Francisco da Costa Guterres, ikus mai koalia no deklara abertamente ba públiku, katak nia mak hasai despaixu “demoradu” promosaun diviza ba Superintendente Polísia Julia da Gama.

Notísia Relevante: Despaixu Promosaun Superintendente Polísia Julia Gama “Demoradu” Husi Ministru Interiór

“Despaixu ne’e ha’u nian duni, Komandante Jerál Sesante Komisáriu Jerál  Henrique da Costa nunka hasai despaixu ida kona-bá promosaun, Komadante Jerál sesante so haruka karta ba ha’u kona-bá lista membru ofisiál susperior sira ne’ebé priense rekezitu mai ha’u, mas  despaixu ne’e ha’u nian,” Ministru  Francisco da Costa Guterres, informa hodi responde Jornalista iha Palásiu Govenru,  Kuarta (01/04/2026).

Ministru Francisco da Costa Guterres konfirma katak parte Ministériu Interiór bolu ona Superintendente Polísia Julia da Gama tanba ne’e hein nia prosesu investigasaun hotu ona sei retoma fali nia diretu diviza husi Superitendente atu prmove ba Superintendente-Xefe Polísia.

“Hakarak ka lakohi despaixu ministeriál nian ne’ebé kestaun ida-ne’e Julia da Gama mós kompriende no nia hatene, nia la lakon diretu prosesu tenke la’o tuir regra hanesan membru Polísia ida tenke submete ba regra ne’ebé iha, kuandu haré buat hotu la’o los ona, prontu nia direitu retoma fali ba promosaun deviza,” Francisco da Costa Guterres hateten.

Francisco da Costa Guterres subliña nia parte hasoru malu ona ho Komandante Jerál PNTL, Komisáriu Assistente Afonso dos Santos ho Segundu Komandante Jerál PNTL Komisaria Asistente Natercia Eufrasia Soares Martins, hodi responsabiliza ba problema demoradu Superitendente Julia da Gama nia promosaun diviza.

Husi sorin seluk tuir gravasaun voice ne’ebé Rafa.tl asesu nota katak liuhosi telefone (bele mós telefone WhatsApp),   Xefe Gabinete Minitru Interiór nian, Paulo Asiss Belo, komunika ona ho Superitnedente Polísia Julia da Gama, atu kalma oituan hodi hein prosesu retoma promosaun diviza iha tmepu badak nia laran.

“Iha prosedimentu (prosedur) barak ita tenke kumpre. Ne’ebé Komandante Julia kalma oituan nu’udár mós veterana ida hodi haré ba situasaun ne’e, oinsá mak  mak ita  hotu hamutuk bele estabiliza ho diak. Nia (Komisáriu Jerál Polísia Hernrique da Costa-red)    ita-nia maluk veteran  hotu. Sé Komandante Polísia Departamentu Justisa haruka fali buat ruma mai, ita halo promosaun bele fulan-oin. Ha’u husu bai ta kalma  oituan,” Paul Assis Belo hateten.

Iha Komuniukasaun ne’e, Supetindente Polísia Julia Gama, hatán de’it “pronto” no “prontu” hodi aprezenta mós nia idade  43 ba 44 moris iha Ataúro.

Superitendente Polísia Júlia da Gama iha komunikasaun ne’e mós aprezenta ba Paul Assis Belo  ne’ebé lidera  mós Komisaun Supervizaun ba Rekrutamentu Membru Foun Polísia Nasionál Timor-Leste (PNTL) 2025, kona-bá ninia envolvimentu ka kontribuisaun ba luta ukun rasik an.

Reportajen ekipa Rafa.tl