Timor-Leste ho Portugal Sei Assina Kuadru Kooperasaun iha Área Defeza

Embaxadór Portugal mai Timor Leste, Duarte Bue Alves assina livru bainaka nian bainhira halo enkontru ho Ministru Defeza Timor-Leste, Kontra-Almirante Donanciano da Costa Gomes Pedro Klamar Fuik, Kinta (19/03/2026). Imajen/Rafa.tl

DÍLI, RAFA.tl– Timor-Leste ho Portugál sei assina kuadru kooperasaun iha área defeza no halo preparasaun ba iha serimónia importante Comunidade dos Países da Lingua Portuguesa (CPLP) ne’ebé Timor-Leste sei asume ofisiál hanesan prezidénsia iha tinan 2027.

Ministru Defeza, Kontra-Almirante Donanciano da Costa Gomes Pedro Klamar Fuik, ba jornalista sira iha edifísiu Ministériu Defeza, Fatuhada, Kinta (19/03/2026), informa  hasoru malu ho Embaixadór Portugal iha Timor Leste, Duarte Bue Alves, hodi deskute kona-bá preparasaun ba seremonia importante CPLP ne’ebé sei realiza iha tinan 2027.

“Portugal iha kooperasaun ho ita, liliu iha ámbitu defeza iha ona programa kuadru ida ne’ebé prepara ona, ne’ebe ita hein katak sei bele assina iha tempu badak define koopreasaun entre Portugal ho Timor Leste iha ámbitu defeza,” Ministru Pedro Klamar Fuik hateten.

Iha sorumutu ne’e, parte rua ko’alia mós kona-bá prezidénsia CPLP, tinan ida-ne’e atu haré ikus oinsá maka organiza enkontru Ministru Defeza CPLP nian atu halo iha ne’e ka halo iha Portugal, depende ba situasaun global.

Iha parte seluk, Embaxadór Portugal iha Timor Leste, Duarte Bue Alves, hateten agradese ba Ministru Defeza hodi ko’alia kona-bá kooperasaun bilaterál  iha área defeza liuliu iha forsa armada nian.

“Ba oin saida mak ita  halo  iha tinan hirak ikus ne’e iha área ida ne’e, diálogu ne’ebé eziste entre Ministériu  Defesa  Timor Leste no Ministériu Defeza Portugal. Ami ko’alia uitoan kona-bá situasaun globál hanesan akontese no  agora ita hotu hatene situasaun geopolitik partikularmente iha Médiu Oriente hamosu inserteza balun no difikuldade tátika no lojistika tanba viajen difisil liu entre Eropa no rejiaun ida-ne’e iha mundu,” Duarte Bue Alves hateten.

Duarte Bue Alves afirma ba oin sei tuur hamutuk hodi haré kondisaun no data ba forum CPLP tanba ne’e importante tebes ba nasaun sira ne’ebé ko’alia lian Portugues, tinan ne’e, Timor-Leste maka sei prezide atividade  CPLP.

Reportajen ekipa Rafa.tl