Governu husu Ministériu Públiku Halo Auditóriu Ba Akizasaun Aviaun Twin Otter no Ró Haksolok

Ró Haksolok ho Twin Otter. Imajen/Repro

DÍLI, RAFA.tl– Governu Timor-Leste sei haruka dokumentu legál kona-bá aviaun Twin Otter no Ró Haksolok ba Prokuradoria Jerál Repúblika hodi halo investigasaun tuir prosesu legál.

Primeiru-Ministru Kay Rala Xanana Gusmão, Kinta (19/03/2026), ba jornalista sira iha Palásiu Prezidensiál, informa kompañia auditór internasionál Ernst & Young aprezenta ona relatóriu ba Governu ho dokumentu komprovativu sira kona-bá aviaun Twin Otter no Ró Haksolok, nune’e governu sei submete  ba Ministériu Públiku atu halo ona investigasaun.

“Kuandu Ernst & Young nian haruka ona mai governu relatóriu ne’ebé boot ho dokumentu ne’ebé prova kona-bá buat rua; Aviaun agora iha hela ne’ebá ne’e no mós kona-bá Ró Haksolok mak governu sei haruka ba Prokuradoria Jerál Repúblika atu hahú ona halo investigasaun no prosesu legal,” Xanana Gusmão informa.

Xefe Governu  hateten ba Prezidente Repúblika José Ramos-Horta katak,  iha reuniaun Konsellu Ministru, Kuarta-ne’e, fó apresia boot tebes ba Ernst Young ne’ebé halo hotu tiha ona auditória ne’ebé fornese katak auditória ne’ebé haré ba sala no iregularidade hotu-hotu, oinsá atu aprezenta dadus konkretu kona-bá saida de’it mak akontese iha aspetu tékniku, polítiku no institusionál liu-liu aspetu korrupsaun.

“Ne’ebé pois rona hotu fó apresia boot tebes ba Ernst Young tanba Ernst Young mós ami husu atu halo lae orsida ami mak halo dehan politizasaun tanba ne’e só mai husi estranjeiru hodi hatudu mós katak problema jestaun, instituisaun atu halo falta relatóriu no arkivu ne’e ita ko’alia tiha ona, iha ne’e mós auditória fornese ne’ebé fó mai mós dokumentu lakon hotu ida ne’e mak sala boot,” Xanana hateten.

Iha reuniaun konsellu Ministru, Kuarta (18/03/2026), Governu halo análize ba konkluzaun auditóriu ne’ebé halo husi EY Portugal kona-bá prosesu akizasaun no jestaun husi aviaun Twin Otter no konstrusaun husi Ró haksolok ne’ebé hala’o husi Autoridade Rejiaun Administrasaum Espesiál Oé-Cusse Ambeno  (RAEOA).

EY Portugal hola parte iha rede internasional Ernst & Young, organizasaun servisu profesionál ida ne’ebé boot liu iha mundu, ho esperiénsia hodi halo auditória ba entidade públiku no privada sira.

Durante inkontru Konsellu Ministru aprezenta mós diskrisaun ida kona-bá prosesu akizasaun, jestaun, no konstrusaun ba ekipamentu sira ne’ebé temi ona, no mós konkluzaun prinsipál sira husi auditóriu forense.

Reportajen ekipa Rafa.tl