Governu Koopera ho Setór Privadu Asegura Estoke Kombustível no Kontrola Presu iha Merkadu

Ministru Petróleu no Rekursu Minerais, Francisco da Costa Monteiro. Imajen/Rafa.tl

DÍLI, RAFA.tl– Governu liu husi Ministériu Petróleu no Rekursu Minerais (MPRM) kontinua koopera ho setór privadu sira iha Timor-Leste hodi garante no asegura estoke kombustível iha merkadu nasionál.

Notísia Relevante: ETO Rejeita Akuzasaun Manipulasaun Presu, Rekorda Kona-bá Presu Kombustível Ne’ebé Sa’e iha Globál

Ministru Petróleu no Rekursu Minerais, Francisco da Costa Monteiro, Tersa (17/03/2026), iha edifísiu MPRM, hateten kona-bá estoke kombustível governu garante to’o fulan-rua, tanba governu kontinua estabelese koordenasaun ida ne’ebé efetivu  ho kompañia importadór kombustível sira hotu.

Ministru Francisco da Costa Monteiro informa, iha semana kotuk Ministériu bolu Autoridade Nasionál Petróleu (ANP), Timor GAP, E.P no kompañia importadór sira, hanesan Esperança Timor Oan (ETO) ho Pertamina Internasional Timor (PITSA), hodi ko’alia saida maka entidade idak-idak halo iha situasaun ida agora komesa ba to’o tempu ne’eb’e tuir mai.

Governu mós kontinua prepara alternativu sira, oinsá atu responde ba situasaun sira liga ho funu iha Médiu Oriente, liu-liu karik iha situasaun ida-ne’e kontinua no fó impaktu ba nasaun sira ne’ebé fornese kombustível mai Timor-Leste paradu.

“Governu prontu foti media seluk hodi responde ba kestaun ida-ne’e. Iha nasaun balu ne’ebé governu kontaktu ona, hodi bele ajuda Timor-Leste iha situasaun urujente sira ne’ebé nasaun ida ne’e presiza,” Ministru Francisco da Costa Monteiro hateten.

Kona-bá  kombustível estoke tuan ne’ebé estasaun kombustível sira hasa’e tuir idaidak nia hakarak, Ministru Francisco da Costa Monteiro, klarifika katak ida-ne’e la’ós de’it akontese iha Timor-Leaste, maibé ne’e akontese iha nasaun hotu-hotu, liu-liu nasaun sira ne’ebé maka importa mina liu husi Médiu Oriente.

MPRM ne’ebé tau matan ba iha asuntu petróleu no rekursu minerais kontinua tau atensaun ba asuntu ida-ne’e, hodi kontrola nafatin postu abastesimentu sira, nune’e labele aproveita situasaun ida-ne’e hodi hasa’e presu ne’ebé maka’ás liu.

“Governu mós sei halo observasaun ba situasaun sira ne’e, no sei foti medida ruma hodi nune’e presu kombustível ne’e labele aumenta maka’ás liu iha Timor-Leste kompara ho nasaun seluk ne’ebé maka iha mundu dadaun ne’e presu  balu kada litru ho folin $2.50 ba to’o $ 3.00,” Nia informa

Ministru Francisco da Costa Monteiro subliña, iha Timor-Leste autór sira ba kombustível nasionál iha komprensaun ne’ebé maka di’ak, no konsege responde ba merkadu  ho justu.

Durante governu nia observasaun no kotrolu iha estasaun kombustível sira, seidauk iha postu kombustível ne’ebé manipula presu kombustível, maibé hotu-hotu nia presu sei razuavel no tuir presu mundiál.

Reportajen ekipa Rafa.tl