PNTL Husu Kandidatu Polísia Foun Kumpri Lei Manifestasaun

Polísia fó instrusaun ba manifestante sira atu kumpre lei manifestasaun. Imajen/Rafa.tl

DÍLI, RAFA.tl– Polísia Nasionál Timor-Leste (PNTL) Munisípiu Díli, husu kandidatu Polísia foun sira ne’ebé la pasa ba teste médiku iha prosesu rekrutamentu atu halo asaun pasífika tenke kumpri lei ne’ebé vigora.

Notísia Relevante: Polísia ho Veteranu Nia Oan Na’in-143 Tama iha Lista Teste Médiku Vaga PNTL

Komandante PNTL Munisípiu Díli, Superintendente Xefe Polísia Orlando Gomes, ba jornalista sira iha nia knaar fatin, Segunda (16/03/2026), husu ba kandidatu polísia foun sira ne’ebé la pasa ba teste médiku iha prosesu rekrutamentu atu halo asaun pasífika hodi eziji Governu  anula prosesu rekrutamentu ne’ebé iha tenke kumpri lei ne’ebé vigora.

Komandante Polísia Munisípiu Díli esplika, sidadaun hotu iha direitu atu hatudu sira-nia aspirasaun liu husi manifestasaun, maibé atividade refere tenke halo tuir prosedimentu legál no respeita orden públiku.

“Ita nasaun demokrátiku iha liberdade halo espresaun iha públiku, maibé ita nafatin tuir regra lei Manifestasaun nian Númeru 1/2006 tenke nafatin tuir regras, maske iha karta koñesimentu atu hatama iha Komandu Jerál liu husi operasaun, maibé nafatin labele halo manifestasaun iha espasu fatin públiku,” Superintendente Xefe Polísia Orlando Gomes.

Orlando Gomes afirma, kandidatu sira nia manifestasaun ne’ebé realiza iha areadores Universidade Nasionál Timor Lorosa’e (UNTL) nian iha Caicoli ne’e seidauk iha konkordánsia entre Polísia ho kadidatu sira, tanba ne’e la autoriza.

“Karta koñesimentu hato’o ona ba iha Komandu Jerál iha semana kotuk, maibé liu husi Komandante operasaun halo kontaktu ba porta-voz manifestante sira, maibé la atende, tanba ne’e ita nafatin kumpri lei manifestasaun katak tenke komunika ba sira, para ita bele deside fatin ba manifestasaun ninian,” nia. tenik.

Nia mós husu ba parte organizadór sira atu koordena uluk ho autoridade kompetente, antes halo manifestasaun, hodi prevene buat ruma ne’ebé bele hamosu disturbasaun ba seguransa no estabilidade iha kapitál.

PNTL afirma sei kontinua halo monitorizasaun durante atividade refere, atu garante manifestasaun la’o ho dame no la iha violasaun lei iha área públika.

Tuir informasaun ne’ebe Rafa.tl aseusa, kona-bá kandidatu sira nia karta manifestasaun ne’e hakarak hala’o iha resintu kampus FASPOL-UNTL, durante fulan ida,  maibé semana ida hala’o manifestasaun dala-tolu hahú husi Segunda to’o Kuarta.

Reportajen ekipa Rafa.tl