Polísia Prende Scooter Rua Tanba La Uza Kapasete

Scooter ne'ebé autpridade polísia halo apreensaun tanba komete infrasaun. Imajen/Rafa.tl

DÍLI, RAFA.tl- Xefe Seksaun Tránzitu Munisípiu Díli, Superintendente Asistente  Polísia Afonso da Silva, Kuarta (11/03/2026), informa ekipa konjunta husi Polísia Seksaun Tránzitu, Diresaun Nasionál Transporte Terestre hala’o operasaun iha semana ne’e hodi  prende motór Scooter rua tanba  komete  infrasaun ka la uza kapasete.

Notísia Relevante: DNTT ho PNTL La Tolera Menoridade Konduz Scooter iha Estrada Públiku

Operasaun ne’ebé ekipa konjunta realiza ne’e hodi asegura seguransa iha estrada no prevene asidente ne’ebé dala barak akontese, tanba utilizasaun motór Scooter la tuir regra.

“Foin dau-dauk ami halo operasaun konjunta ho Diresaun Nasionál Transporte no Terretre (DNTT) iha Díli laran, kuaze oras tolu nia laran, prende Scooter  rua, tanba komete infrasaun liu-liu la uza kapasete, nune’e ami prega koima minimu ba sira selu iha Banku,” Superintendente Asistente Polísia Afonso da Silva informa ba Rafa.tl iha nia knaar fatin iha Díli.

Superintendente Asistente Polísia ne’e husu ba sidadaun hotu ne’ebé utiliza motor siklu no scooter tenke monta asesoris, taka kapasete no iha karta kondusaun kategoria A1, tanba ida ne’e tuir lei no Kódigu estrada ne’ebé vigora.

“Se laiha karta kondusaun no la taka kapasete konsidera infrasaun, entaun ami prende no aplika multa minimu US$6.00 to’o US$30.00 ba  infratór sira ba selu iha banku,” nia hateten.

Superintendente Asistente Polísia Afonso da Silva husu ba komunidade liu-liu inan-aman sira, atu tau atensaun ba oan sira hodi evita no diak liu bandu oan sira meniroidade konduz Scooter iha públiku.

Nia subliña katak bainhira   Polísia Tránzitu hetan minoridade sira konduz scooter  sei hetan prende, nune’e bolu inan-aman hodi responsabiliza no halo deklarasaun.

Reportajen ekipa Rafa.tl