Rota Direta Aero Díli Ba Darwin Hametin Lasu Ekonómiku no Estratéjiku ho Timor-Leste

Aero Díli konfirma ho parte Austrália kona-bá lansamentu servisu aero direta entre Darwin no Díli. Imajen/Espsiál

DÍLI, RAFA.tl–Aeroportu Internasionál Darwin,  Tersa (10/03/2026), simu ho ksolok anúnsiu husi Aero Díli ne’ebé konfirma lansamentu servisu aero direta entre Darwin no Díli hodi  hametin liután lasu ekonómiku, komérsiu no investimentu entre Austrália no Timor-Leste ho parseiru rejionál ida ne’ebé besik liu.

Notísia Relevante: Marsu no Maiu Tinan Ne’e, Aero Díli Lansa Vô Ba Malázia no Austrália

Hahú iha 24 fulan-Maiu 2026, Aero Díli sei halo primeira vô husi Díli ba Darwin-Austrália ho nia  oráriu vô dala-rua iha semana ida hodi liga diretamente Darwin no Díli.

Komunikadu ofisiál ne’ebé Rafa.tl asesa husi empreza Aero Díli relata katak, rota foun Aero Díli nian husi Díli ba Darwin-Austrália, bele kria oportunidade foun sira ba envolvimentu emprezariál, investimentu, kolaborasaun governu nian no komérsiu rejionál iha Tasi Timor.

Servisu direta foun Aero Díli nian ne’e hametin Darwin nia papél nu’udár odamatan entre Austrália no Timor-Leste no kria oportunidade boot liután ba envolvimentu emprezariál, parseria investimentu no dezenvolvimentu ekonómiku iha rejiaun rua ne’e hotu.

“Ha’u fó parabéns ba Aero Díli ne’ebé habelar ninia rede rota internasionál ho destina dahuluk mai Darwin-Austrália,” Ministra ba Komérsiu, Negósiu no Relasaun Aziátika  Norte Austrália, Robyn Cahill hatete.

Ministra Robyn Cahill apresia tebes ho esforsu no inisiativa Aero Díli nian, tanba tuir nia, ida-ne’e hanesan pasu pozitivu ida ne’ebé hametin parseria komérsiu, negósiu, investimentu, no kulturál ne’ebé kleur ona entre Austrália no Timor‑Leste no ida-ne’e mós fornese opsaun, kompetisaun no konetividade barak liután ba territoriu sira.

“Nu’udár nasaun ida ne’ebé maka joven liu iha Ázia no membru foun liu hosi ASEAN, furak tebes atu haré Timor-Leste harí ligasaun internasionál sira ne’ebé maka presiza atu apóia nia futuru ekonómiku,” Robyn Cahill tenik.

Xefe Ezekutivu Grupu Dezenvolvimentu Aeroportu, Tony Edmondstone hatete, rota foun ne’e reprezenta pasu signifikativu hodi hametin parseria ekonómika entre Austrália Norte no Timor-Leste.

“Hadi’a konetividade aviasaun nian maka fundamentál atu permite komérsiu, apóia kolaborasaun indústria nian no hametin relasaun kleur entre ita-nia nasaun rua,” Tony Edmondstone hatete.

“Servisu foun ne’e reforsa Darwin nia pozisaun hanesan odamatan norte Austrália nian no apóia habelar envolvimentu bilaterál entre Austrália no Timor-Leste iha setór oi-oin inklui enerjia, rekursu, infraestrutura, edukasaun no turizmu.”

Liu husi nia diskursu, Prezidente diretór Aero Díli, Lourenço de Olivera, hato’o agradesimentu ba Ministra Robyn Cahill, Embaixadora Timor-Leste nian ba Austrália Inês Maria de Almeida, Konsul Jerál Timor-Leste nian iha Darwin, José Amorim Dias, reprezentante sira husi Grupu Dezenvolvimentu Aeroportu, no bainaka distintu sira hotu ne’ebé hamutuk partisipa iha lansamentu rota foun Aero Díli nian ba Darwin-Austrália iha Aeroportu Darwin.

Lourenço de Oliveira konsidera lansamentu rota foun Aero Díli nian, Díli-Darwin, marka istóriku ida ba Aero Díli, tanba ofisialmente introdús Aero Díli nia servisu foun, liga Díli ho Darwin.

Tuir oráriu ofisiál katak iha loron 24 fulan-Maiu 2026,  Aero Díli sei halo inaugural flight ka sei estabelese ligasaun direta dahuluk entre Díli no Darwin, ho nia operasaun kada Tersa-feira no Domingu iha  kada semana.

“Ha’u hakarak agradese ba autoridade aviasaun Australianu sira ne’ebé maka fó apóiu tebes hodi permite Aero Díli. Oportunidade furak ida-ne’e atu habelar ba iha rejiaun Austrália  no servisu ne’e sei fasilita turizmu no enkoraja ligasaun Darwin–Díli–Bali no vise-versa ba

viajante sira ne’ebé esplora rejiaun. Ho tránzitu badak iha Díli besik minutu 45 de’it, pasajeiru sira sei bele liga ho konveniente entre Darwin no Denpasar (Bali). Porezemplu, viajante sira bele semo hosi Darwin ba Denpasar liuhosi Díli iha domingu no hosi Denpasar ba Darwin via Díli iha tersa-feira sira, kria ligasaun rejionál adisionál ida entre Austrália, Timor-Leste, no Indonézia,” Lourenço de Oliveira hatete.

Aero Díli nia objetivu mak atu halo viajen sai asesível liután no atu liga povu Díli no Darwin—karik liu hosi halibur família sira, apóia kreximentu rejionál, ka kria oportunidade negósiu foun sira.

“Ho introdús rota ida-ne’e, ami fó ba viajante sira opsaun, konfortu no konveniénsia barak liután. Aero Díli nia lema mak “Harí Nasaun,” no lansamentu ne’e nu’udár pasu importante ida iha estratéjia luan liu, ami nia transportadór nasionál ne’ebé foin moris. Ohin loron,  orgullu ida ba Repúblika Demokrátika Timor-Leste. Dala ida tan, ha’u agradese ba ema hotu ne’ebé envolve hodi halo ida-ne’e sai posível, no mós ba organizadór sira eventu  ohin nian. Ami hotu hein atu simu ita-boot iha vô inaugural iha loron 24 fulan-Maiu,” Lourenço de Oliveira hatete tan.

Oráriu Vô – Díli (DIL) ⇄ Darwin (DRW)

Rota Vô Partida Loron Chegada Aviaun

DIL – DRW 8G-271 08:00 09:45 Domingu A319/A320

DRW – DIL 8G-272 10:30 11:15 Domingu A319/A320

DIL – DRW 8G-277 14:15 16:00 Tersa A319/A320

DRW – DIL 8G-278 16:45 17:30 Tersa A319/A320

Reportajen ekipa Rafa.tl