Polísia Sei Halo Apreensaun Bá Minoridade Sira Konduz Scooter

Xefe Departamentu Koordenasaun Jestaun Risku, Formasaun Edukasaun Sívika husi Diresaun Nasionál Tránzitu Seguransa Rodoviária, Superintendente Asistente Polísia Domingos Sarmento Gama. Imajen/Rafa.tl

DILI, RAFA.tl—Polísia Nasionál Timor-Leste (PNTL) liu husi Diresaun Nasionál Tránzitu, Seguransa no Rodoviária (DNTSR)  sei halo koordenasaun ho Diresaun Nasionál Transporte Terrestre (DNTT)  atu kontrola no halo apreensaun bá minoridade ne’ebé konduz scooter ka motór elétriku.

Xefe Departamentu Koordenasaun Jestaun Risku, Formasaun Edukasaun Sívika husi Diresaun Nasionál Tránzitu Seguransa Rodoviária, Superintendente Asistente Polísia Domingos Sarmento Gama,  informa  fulan oin  (Marsu, red) sei halo operasaun ba motór elétriku ka scooter iha Díli laran.

Nia hateten, bainhira iha operasaun ne’e mak motorista sira, liuliu hirak ne’ebé minoridade laiha karta kondisaun no laiha dokumentu sei prende no prosesa tuir lei ne’ebé vigora.

“Dau-daun ne’e mosu preukupasaun barak kona-bá movimentu motór elétriku ka scooter iha dalan públiku,  tanba dala barak liu minoridade mak sa’e, dala-ruma tula ema  rua ka tolu no la kumpre  ba iha Kódigu Lei Estrada númeru 6/2003, liu-liu la uza kapasete no la respeita sinál tránzitu,” Superintendente Asistente Polísia Domingos Sarmento Gama, haktuir ba jornalista sira iha Komandu PNTL, Segunda (16/02/2026).

Nia hateten, iha semana rua ba kotuk, Polísia Tránzitu Seguransa Rodoviária ho Diresaun Nasionál Transporte Terrestre halo enkontru konjunta,  atu oinsá  foti medida ba menoridade sira ne’ebé konduz scooter iha estrada públiku no lori risku boot ba sira-nia vida rasik.

Nia  esplika, motór scooter ne’e la kategoria hanesan bisikleta, maibé ida ne’e  konsidera iha artigu kódigu estrada númeru 6/2003 iha artigu 101° motór siklu ne’ebé kategoria roda rua no roda  tolu. Tanba ne’e, Superintendente Asistente Polísia Domingos Sarmento Gama, afirma sidadaun sira ne’ebé utiliza motór scooter  tenke  iha dokumentu no tenke iha mós karta kondusaun.

Iha Leí kódigu estrada artigu  120° ko’alia  kona-bá sidadaun ne’ebé mak direitu atu hetan  karta kondusaun, katak atu hetan karta kondusaun ho kategoria A1 ne’e  tenke tinan 16 ba leten, se karta kondusaun AB ka C ka  kategoria E  ne’e tenke tinan  18 ba leten.

Tuir Polísia nia observasaun katak oras ne’e dau-daun maioria menóridade sira, husi tinan 10 to’o tinan 12, maka konduz motór elétrika ka scooter iha kapitál Díli no  hakarak ka lakohi, Estadu  liu husi parte Diresaun Tránzitu Seguransa Rodoviária ho Diresaun Nasionál Transporte Terrestre (DNTT)  tenke hola medida bazeia ba artigu 101°, tanba  scooter ne’e nia velosidade ne’e kuaze hanesan motór baibain sira.

Superintendente Asistente Polísia Domingos Sarmento Gama  afirma scooter ka motór elétriku  ne’e kuandu envolve iha asidente, soke ema  bele mate, entaun  Diresaun Tránzitu Seguransa Rodoviária ho Diresaun Nasionál Transporte Terrestre deskute ona no halo ona akordu ida atu avizu ba públiku, liu-liu ba inan-aman sira ne’ebé mak sosa  scooter ba oan  tenke ho idade adultu, labele fó ba menoridade sira utiliza.

Nia fundamenta katak bainhira  sosa  motór scooter tenke trata motór nia dokumentu no tenke rejista iha Diresaun Nasionál Transporte  no Terrestre para bele kontrola ninia identidade sira ne’ebé mak rejistu ona.

“Bá sira ne’ebé  minoridade, inan-aman sira labele autoriza para utiliza motór scooter,  tanba bainhira Polísia aviza ona, ba oin Polísia sei halo atuasaun. Se enkuantu Polísia deteta mak labarik ka minoridade sira mak uza hela motór scooter sira ne’e, ita (polísia, red) kaer no bolu inan-aman  halo deklarasaun  tanba la kumpre ba ita- nia lei kódigu Estrada,” Superintendente Asistente Polísia Domingos Sarmento Gama hateten.

Reportajen ekipa Rafa.tl