Komandu Jerál PNTL Esklarese Polémika Rekrutamentu Kadetes PNTL Ba Komisaun B

Komisaun B PN halo enkontru ho Komandu Jerál PNTL hodi konfirma prosesu rekrutamentu kadetes PNTL ne'ebé sai polémika tanba deskonfia iha favoritizmu no nepotizmu. Imajen/Rafa.tl

DILI, RAFA.tl– Komandante Jerál PNTL Komisáriu Jerál Polísia Henrique da Costa ho Segundu Komandante Jerál, Komisáriu Pedro Belo nu’udar mós Prezidente Juri ba rekrutamentu PNTL 2025, Sesta (13/02/2026),  halo enkontru ho Komisaun B Parlamentu Nasionál hodi esklarese polémika rezultadu rekrutamentu kadetes foun PNTL na’in-400.

Notísia Relevante: PM Xanana Sei Envolve Polísia Portugal ho Austrália iha Prosesu Foun Rekrutamentu PNTL

Iha enkontru ne’e Komisaun B  PN husu klarifikasaun kona-bá prosesu selesaun, rezultadu teste no garantia katak rekrutamentu halo ho transparénsia no justu tuir regra no rekizitu ofisiál ne’ebé kontempladu iha mata-dalan rekrutamentu nian.

“Buat prinsipál ida mak ne’e, iha prosesu ne’e tau konsiderasaun no  atensaun ba iha prosesu ne’e ho transparénsia, ema preokupa liu mak kona-bá familiarizmu, atu nune’e, haré asuntu sira ne’e, tau iha prátika hodi hahú prosesu ida ne’ebé mak justu. Ita iha tempu loron 20 para servisu hamutuk hodi hare,” Komisáriu Jerál Polísia Henrique da Costa, informa ba jornalista sira hafoin enkontru ho Komisaun B PN iha Komandu Jerál PNTL.

Komisáriu Jerál Polísia ne’e hatutan, kona-bá prosesu kandidatu sira ne’ebé sei mai ne’e ho transparénsia, nakloke ba sidadaun sira hotu, no ida ne’e mak ema hotu-hotu hakarak, la’ós komandu rasik, ema hotu-hotu hakarak implementa prosesu ida ne’ebé mak transparénsia, nakloke ba ema hotu, atu nune’e, ema hotu hetan oportunidade ne’ebé mak hanesan.

Prezidente Komisaun B Parlamentu Nasionál, Domingos Augusto Deker hatete, kona-bá lamentasaun Kkdetes foun PNTL nian obriga Komisaun B mai hasoru malu ho Komandu Jerál PNTL hodi husu esplikasaun klaru.

“Bazeia ba lamentasaun sira iha públiku, liu-liu kandidatu kadetes sira ninia lamentasaun, liga ba prosesu rekrutamentu ne’e, tuir sira nia hanoin mosu iregularidade iha ne’ebá, hanesan la iha transparénsia, familairizmu, favoritizmu, sasán sira ne’e hotu, maka depois komisaun B simu lamentasaun sira ne’e tenke deside hanesan reprezentante povu, hala’o nia knaar tuir rezimentu Parlamentu Nasionál nian, atu halo konfirmasaun ba Ministériu Interiór no kontinua mai iha Komandu Jerál PNTL halo konfirmasaun kona-bá lamentasaun sira ne’e iha serteza ka lae,” Deputadu Domingos Augusto Deker hateten.

Prezidente komisaun B rekoñese, ho rezultadu ba rekrutamentu ba kadetes PNTL ne’e, iha iregularidade, tanba ne’e presiza ema hotu atu kontribui hodi hadi’a problema ne’e.

Komisaun B nia parte sei kontinua ba halo vizita fiskalizasaun ba komisaun rekrutamentu hodi bele hetan dadus ruma, nune’e bele kontribui liu husi relatóriu.

Nia hateten Komisaun B nia pozisaun mak rekoñese iha iregularidade, maibé bazeia ba nesesidade Komandu PNTL nian, liu-liu preokupasaun kona-bá menus rekursu umanu iha instituisaun ida ne’e presiza duni halo rekrutamentu.

“Ita suspende para parte hotu-hotu kontribui ba hadi’a iregularidade ka fallansu sira ne’ebé iha,” Deputadu Domingos Augusto Deker  tenik.

Komisaun B rekomenda ba Komisaun Rekrutamentu PNTL 2025 ne’ebé sei tuir mai tenke evita  familiarizmu, favoritizmu hodi bele garante transparénsia ba sidadaun sira.

Reportajen ekipa Rafa.tl