Emmanuel F.C Sei Hatudu Agresividade iha Jogu Kontra F.C Porto Taibessi

Asistente Treinadór Emmanuel F.C, Van Basten garante manán FC Posto Taibessi iha jogu meia-finál, Sábadu, 14 fulan-Fevereiru 2026. Imajen/Rafa.tl

DILI, RAFA.tl– Ekipa Emmanuel F.C no F.C Porto Taibessi iha ambisaun hanesan, hakarak hakat ba finál Taça da Liga FFTL hodi hasoru adversáriu sira iha finál no hadau títulu kampiaun.

Notísia Relevante: Emmanuel F.C ho AD SLB Laulara Fahe Pontu Hanesan iha Jogu Abertura Taҫa da Liga

Asistente treinadór Emmanuel F.C, Van Basten liu husi konferénsia ba imprensa iha estádiu Munisipál Díli, Kinta (12/02/2026),  hatete, nia ekipa preparadu hodi joga iha faze meia-finál kontra F.C Porto Taibessi no sei hatudu jogu atrativu ho maneira atake, atu nune’e, bele manán iha jogu primeira faze.

“Ami iha preparasaun másimu, tanba ami iha tempu semana rua depois  ami joga kontra Aitana. Ami mai ho karater jogu nafatin, ami sei fó jogu ne’ebé atrativu, ami mai ho hanoin ida hakarak ba finál,” Van Basten hateten.

Iha fatin hanesan, treinadór ekipa F.C Porto Taibessi, Luís Simões afirma, nia ekipa mós preparadu, no iha vontade hakarak manán Emmanuel F.C.

“Preparasaun másimu desde joga hotu ho FIEL, preparasaun  ba joga fali iha kuatru finais, konserteza ami nia preparasaun di’ak. Konserteza ita treinadór hakarak ko’alia dehan manán, sempre iha ita nia vontade bola nian, ne’ebé sira ko’alia hanesan  ne’e  iha sira nia parte, ami mós iha ami nia parte ami mós hakarak manán,” Luís Simões hateten.

Tuir oráriu jogu Taça da Liga iha faze meia-finál ne’e, Emmanuel F.C sei hasoru F.C Porto Taibessi iha Sábadu, 14 fulan-Fevereiru ne’e, tuku 18:00 OTL, no sei joga iha Estádiu Munisipál Díli.  Iha jogu iha faze meia-finál ne’e, sei joga dala rua ho leg dahuluk no leg daruak.

Notísia Relevante: Coração F.C iha Ambisaun Manán, F.C Portu Taibessi Garante Asegura Pontu Tolu

Reportajen ekipa Rafa.tl