PNTL Asegura Sidadaun Ida Hela iha Indonézia Falsifika Dokumentu Atu Simu Pensaun Veteranu

Timoroan ho nasionalidade Indonézia ne'ebé tenta falsifika dokumentu hodi simu pensaun veteranu. Imajen/Espesiál

DILI, RAFA.tl– Porta-voz Komandu Jerál Polísia Nasionál Timor-Leste (PNTL), Superintendente Polísia João Belo dos Reis, informa Servisu Investigasaun Kriminál hamutuk ho ekipa Konsellu Veteranu asegura Timoroan ida ho inisiál MB ne’ebé hela iha Indonézia falsifika dokumentu atu simu pensaun veteranu nian iha  Munisípiu Covalima.

Notísia Relevante: Sidadaun ho Nasionalidade Indonésia Hetan Pensaun Veteranu iha Ona Investigasaun

“Ita nia DSIK iha kooperasaun di’ak ho parte Ministériu Asuntu Kombatente no Libertasaun Nasionál nian, ne’ebé ami fahe informasaun balu konsege  detekta, tinan kotuk, sidadaun ida husi Manatuto no agora detekta tan sidadaun  ida husi parte Suai nian, ne’ebé mak hela iha Indonézia tenta atu falsifika dokumentu  ne’ebé mak fasilita husi ema balun atu simu osan veteranus, seidauk konsege simu no halo prosesu identifikasaun no prosesu agora la’o hela. Dokumentu ne’ebé iha mak dokumentu Billete Identidade, passaporte no sertidaun RDTL,” porta-voz Komandu Jerál PNTL, Superintendente Polísia João Belo dos Reis ba jornalista sira iha Ministériu Interiór Vila-Verde, Díli, Kinta (05/02/2026).

Superintendente Polísia ne’e hatutan, ekipa Servisu Investigasaun Kriminál halo ona investigasaun ba sidadaun ho inisiál MB  hodi buka tuir nafatin autór sira ne’ebé fasilita dokumentu hanesan Billete Identidade no Passaporte ba sidadaun ne’e.

“Prosesu sei la’o hela, buat sira ne’ebé mak hola parte iha justisa ha’u labele publika ba maluk sira agora, maibé prosesu idenfikasaun la’o hela,  no ami sei aprezenta ba Ministériu Públiku. Sidadaun ne’e agora iha hela nia família, mas nia dokumentu sira ita asegura, prosesu ba oin, no naran inisiál MB,” Superintendente Polísia João Belo dos Reis hateten.

Polísia Diresaun Servisu Investigasaun Kriminál aprezenta ona kazu falsifikasaun dokumentus veteranus ba Ministériu Públiku, hodi hein karta mandadu. Nune’e bele halo prosesu julgamentu Primeiru Interogatóriu ba Timoroan ho nasionalidade Indonézia ne’e.

Reportajen ekipa Rafa.tl