Governu Aprova Projetu Lei Kona-bá Kódigu Rejistu Sivíl

Serimonia hasa'e Bandeira Nasionál iha Palásiu Governu. Imajen/Média GPM

DILI, RAFA.tl– IX Governu Konstitusionál liu husi Reuniaun Konsellu Ministru, Kuarta (04/02/2026), aprova Projetu Lei ne’ebé aprezenta hosi Ministru Justisa, Sérgio de Jesus Fernandes da Costa Hornai, kona-bá Kódigu Rejistu Sivíl.

Iha komunikadu ofisiál ne’ebé Rafa.tl asesa husi Portál Governu hatete, ho diploma ida-ne’e hakarak atu estabelese sistema rejistu sivíl ida ne’ebé detalladu, dinámiku no seguru, ne’ebé dezeña atu garante rejistu no konservasaun ba faktu no aktu hotu-hotu ne’ebé iha relevánsia jurídika ne’ebé marka perkursu moris ema nian, hahú husi moris to’o mate.

Enkuantu Kódigu Sivíl estabelese direitu no devér ema nian iha sira-nia relasaun familiár, patrimoniál no relasaun sosiál.

Kódigu Rejistu Sivíl komplementa rejime ida ne’e hodi define regra no prosedimentu sira ne’ebé aplikável ba rejistu ofisiál, hosi faktu sira-ne’e iha Estadu nia oin.

Diploma ne’e klarifika kompeténsia no prazu, introdús hadi’a prosedimentu no promove modernizasaun servisu sira, ho objetivu atu hametin seguransa jurídika, fasilita asesu sidadaun sira nian ba rejistu sivíl no halo prosesu sai simples, efisiente no lalais liu.

Konsellu Ministru aprova mós projetu Dekretu-Lei, ne’ebé aprezenta mós hosi Ministru Sérgio Hornai, kona-bá alterasaun dahuluk ba Dekretu-Lei n. 19/2012, loron 25 fulan-Abríl, ne’ebé aprova Estatutu Ofisiál Justisa nian.

Diploma ida ne’e ho objetivu atu adapta Estatutu Ofisiál Justisa ho reforma sira ne’ebé la’o hela iha setór justisa, liu-liu organizasaun judisiária foun no estatutu Ministériu Públiku no Defensoria Públika nian, liu hosi esklarese kompeténsia, reforsa knaar ofisiál justisa sira nian hodi fó apóiu ba majistradu no defensór públiku sira, no atualiza kuadru funsionál ida-idak.

Alterasaun ne’e introdús mós rekizitu kualifikasaun akadémika ne’ebé ezijente liu hodi tama iha karreira, reforsa formasaun kontinua, hadi’a rejime remuneratóriu, no atualiza direitu no benefísiu balun, ho objetivu atu kontribui ba efisiénsia, kualidade no valorizasaun ne’ebé boot liu ba funsionamentu justisa iha Timor-Leste.

Reportajen ekipa Rafa.tl