MS Rejista Kazu Dengue Hamutuk 1.700 no Na’in-Haat Lakon Vida

Ministra Saúde, Élia A.A dos Reis Amaral. Imajen/Rafa.tl

DILI, RAFA.tl – Hahú husi fulan-Dezembru 2025 to’o fulan-Fevereiru 2026, Ministériu Saúde (MS)  rejista kazu dengue hamutuk 1.700-resin no na’in-haat lakon vida.

Notísia Relevante: HNGV Rejista Kazu Dengue 245 no Na’in-haat Lakon Vida

Ministra Saúde, Élia A.A dos Reis Amaral, ba jornalista sira iha Sentru Treinamentu “Korea-Timor-Leste Friendship Sport Centre-Bekora”,  Tersa (03/02/2026), informa Ministériu Saúde simu relatóriu jerál kona-bá dadus nasionál moras dengue hahú husi fulan-Dezembru 2025 to’o fulan-Fevereiru 2026, rejista kazu moras dengue hamutuk 1.700 resin no ema na’in-haat mak lakon vida.

“Iha inísiu fulan-Fevereiru ne’e, ha’u simu relatóriu kazu dengue rejistu 1.700  no husi númeru ne’e na’in-haat maka lakon vida, no agora ita halo prevensaun,’’ Ministra Saúde, Élia dos Reis Amaral.

Governante ne’e afirma, iha kapitál Díli maioria iha área Postu Administrativu Dom Aleixo maka rejista kazu dengue barak liu, no konsidera hanesan  mós área ne’ebé  risku ba moras Dengue. Ho nune’e, Ministériu Saúde tau ona iha ajendamentu atu prevene liu husi maneira fomigasaun (rega susuk).

Ministériu Saúde mós nafatin  garante stoke fomigasaun no abate sufisiente atu halo prevensaun iha kapitál Díli no munisípiu sira.

Prevensaun husi fomigasaun no abate ne’e durante la’o ona iha área sira hanesan, halo ona iha fulan-Dezembru tinan 2025, hahú husi área sira iha kapitál Díli hanesan, iha Aldeia 2 de Outubru, iha mós Postu Administrativu Dom Aleixo, iha Golgota, iha Aldeia 4 de Setembru, no área sira seluk ne’ebé iha kapitál Díli.

“Husu ba komunidade sira, tenke soe lixu iha lixeira,  hamós ambiente sira iha uma lor-loron, labele husik bé-nalihun iha uma ninin sira, komunidade ne’ebé hela besik valeta sira tenke hamós lor-loron atu labele hakiak susuk, tanba dengue impaktu mai husi lixu ne’ebé kria lor-loron,” Ministra Élia Amaral hateten.

Ministra Saúde mós halo klarifikasaun kona-bá objetivu husik susuk Wolbackia husi Austrália mai iha Timor-Leste, katak oinsá maka susuk Wolbackia ne’e hamate susuk inan sira labele kontinua halo produsaun no habokur susuk oan sira.

Susuk Wolbackia ne’e  hanesan inovasaun sientífiku, hanesan nasaun sira ne’ebé  adopta ba realidade sira la iha susuk no atu livre husi susuk la iha, labele depende de’it ba métodu sira ne’ebé iha, maibé hotu-hotu nia kontribuisaun signifikativa ba halo limpeza no tuir maneira prevensaun sira ne’ebé iha.

Reportajen Ekipa Rafa.tl