Ramos-Horta ho Anthony Albanese Reafirma Kompromisu Reforsa Mobilidade Traballadór iha Programa PALM

PR Ramos-Horta kondus nia karreta moke tula PM Anthony Albanese ne'ebé akompaña mós husi PM Xanana Gusmão husi Aeroportu mai Palásiu Prezidensiál, Díli. Imajen/Mídia GPR

DILI, RAFA.tl– Prezidente Repúblika (PR), José Ramos-Horta ho Primeiru-Ministru Austrália, Anthony Albanese, Kuarta (28/01/2026),  iha Palásiu Prezidensiál, Díli, halo enkontru bilaterál hodi reafirma Estadu rua nia kompromisu atu reforsa mobilidade traballadór nian iha ámbitu programa Pacific Australia Labour Mobility (PALM)  no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia nian.

Notísia Relevante: Horta-Xanana Simu Primeiru-Ministru Anthony Albanese iha Aeroportu

Iha komunikadu ofisiál ne’ebé Rafa.tl asesu revela katak husi vizita Primeiru-Ministru Austrália, Anthony Albanese, hatudu parseria ne’ebé dura ba tempu naruk entre nasaun rua, ne’ebé reflete lasu pesoál sira amizade nian.

Husi Aeroportu Internasionál Prezidente Nicolau Lobato, Prezidente Repúblika José Ramos-Horta konduz nia veíkulu elétriku Moke hodi tula Primeiru-Ministru Austrália Anthony Albanese no akompaña husi Primeiru-Ministru Xanana Gusmão.

Iha Palásiu Prezidensiál, Primeiru-Ministru Albanese simu ho serimónia ofisiál benvindu nian, inklui hino nasionál sira hosi país rua, inspesaun hosi Guarda de Honra nian no aprezentasaun hosi delegasaun sira hosi nasaun ida-idak.

Líder na’in-rua ne’e bá iha Salaun ASEAN hodi halo asinatura ba livru bainaka nian no fotografia ofisiál ida, tuir kedas ho enkontru entre líder na’in-rua ne’e, akompaña husi sira nia membru delegasaun sira.

Iha enkontru ne’e, Prezidente Ramos-Horta hato’o Timor-Leste nia agradesimentu kle’an ba Austrália nia apoiu konstante ba dezenvolvimentu iha setór oioin.

Diskusaun sira foka ba hametin kolaborasaun iha diversifikasaun ekonómika, seguransa marítima no dezenvolvimentu kapitál umanu.

Iha enkontru bilaterál husi lider país rua ne’e, iha mós diskusaun sira seluk ne’ebé subliña apoiu ba kreximentu setór privadu no projetu estratéjiku boot sira, inklui dezenvolvimentu Greater Sunrise.

Timor-Leste no Austrália la’ós viziñu de’it, maibé nu’udar família. Austrália ho Timor-Leste nia istória ne’ebé fahe, valór komún no kompromisu ba pás no prosperidade halibur ita. Ohin, ita reafirma ita-nia promesa atu la’o hamutuk rumu ba futuru ida ho seguransa, oportunidade no amizade ne’ebé dura ba tempu naruk.

Timor-Leste no Austrália estabelese relasaun diplomátika formál iha tinan 2002. Ohin loron, parseria ne’e abranje kooperasaun polítika, ekonómika, seguransa no sósiu-kulturál, hodi reflete vizaun ne’ebé fahe ba rejiaun ida ne’ebé estável, prósperu no iha ligasaun.

Iha parte lorokraik, Prezidente Ramos-Horta konfere ba Primeiru-Ministru Anthony Albanese Grande Colar da Ordem de Timor-Leste, kondekorasaun aas liu iha nasaun, nu’udar rekoñesimentu ba nia dedikasaun hodi hametin lasu bilaterál sira.

Ekipa ekipa Rafa.tl