Horta-Xanana Simu Primeiru-Ministru Anthony Albanese iha Aeroportu

PR José Ramos-Horta kondus karreta moke tula PM Anthony Albanese ne'ebé akompaña mós husi PM Xanana Gusmão husi Aeroportu mai Palásiu Prezidensiál, Kuarta (28/01/2026). Imajen/Rafa.tl

DILI, RAFA.tl– Prezidente Repúblika, José Ramos-Horta  ho Primeiru-Ministru Kay Rala Xanana Gusmão, simu direta Primeiru-Ministra Austrália Anthony Albanese iha Aeroportu Internasionál Prezidente Nicolau Lobato, Díli.

Primeiru-Ministru Austrália Anthony Albanese to’o iha Aeroportu Internasionál Prezidente Nicolau Lobato ho aviaun Royal Australian Air Force (RAAF), Kuarta (28/01/2026), iha tuku 10:00  dadeer Otl.

Iha Aeroportu, Primeiru-Ministru Austrália Anthony Albanese simu ho parada militár no tara-tais hanesan sinál domin no amizade husi povu Timor-Leste ba povu Austrália, no simu mós ho saragala husi lia-na’in sira no  dansariña sira ho traje tradisionál, hodi bidu no tebe tuir kultura Timor nian.

Iha dalan estudante no komunidade sira simu ho haklalak no basa-liman, ka’er banderolas simbolu Austrália no Timor-Leste  nian hanesan sinal amizade no relasaun bilaterál ne’ebé metin dezde uluk to’o ohin loron.

Husi Aeroportu Internasionál Prezidente Nicolau Lobato, Primeiru-Ministru Austrália Anthony Albanese mai direta Palásiu Prezidensiál tula husi karreta moke ne’ebé kondús husi Prezidente Repúblika, José Ramos-Horta no akompaña husi Primeiru-Ministru Kay Rala Xanana Gusmão.

Tuir ajenda ne’ebé Rafa.tl asesu husi Palásiu Prezidensiál katak, iha tuku 10:30 Otl, Primeiru-Ministru Austrália Anthony Albanese hamutuk ho Xefe Estadu no Xefe Governu sei to’o iha arreadór Palásiu Prezidensiál no sei simu ho Drum Band no moradór sira.

Sei iha Guarda de Honra ne’ebé inisia ho Hinu Nasionál Timor-Leste no Austrália nian  kontinua ho inspesaun parada militár no remata ho aprezentasaun membru governu no entidade husi Prezidente Repúblika José Ramos-Horta ba Primeiru-Ministru Anthony Albanese.

Remata serimónia onra, kontinua tama ba Palásiu Prezidensiál laran, ba salaun ASEAN, Assina Livro de Honra no Foto Offisiál.

Hafoin Foto Offisiál, Prezidente Repúblika José Ramos-Horta ho Primeiru-Ministru Austrália Anthony Albanese kontinua sae ba sala gabinete Prezidente Repúblika nian hodi halo enkontru billaterál.

Iha tuku 10:55 Otl, enkontru kortezia entre Prezidente Repúblika, José Ramos-Horta no Primeiru-Ministru Austrália.

Iha Oras 11:00,  enkontru Bilaterál entre Prezidente Repúblika José Ramos-Horta akompaña husi Membru Guvernu ho Primeiru-Ministru Austrália Anthony Albanese ho nia delegasaun.

Remata enkontru sei iha troka prenda no hafoin Primeiru-Ministru Austrália ho delegasaun husik Palásiu Prezidensiál.

Iha tuku 11:40 Otl, Primeiru-Ministru Kay Rala Xanana Gusmão simu vizita ofisiál Primeiru-Ministru Austrália Anthony Albanese iha Palásiu Governu.

Iha oras 11:45 – 12:00 Otl, reuniaun Tête-á-tête Primeiru-Ministru Kay Rala Xanana Gusmão ho Primeiru-Ministru Austrália Anthony Albanese iha Palásiu Governu.

Iha tuku 12:05 Otl, Primeiru-Ministru Kay Rala Xanana Gusmão reuniaun bilaterál ho Primeiru-Ministru Austrália Anthony Albanese ho delegasaun iha Palásiu Governu.

Iha tuku 12:40  – 12:45 Otl, serimónia formal asinatura “Nova Parceria para a Nova Era” iha sala reuniaun Konsellu Ministru, Palásiu Governu.

Iha tuku 13:00 – 13:25 Otl, konferénsia imprensa konjunta, iha Palásiu Governu.

Hafoin remata husi Palásiu Governu, Primeiru-Ministru Austrália Anthony Albanese sei ba deskansa iha Otel Palm Spring, Fatuhada no tuir ajenda serimónia sira tuir mai ne’e.

Iha Oras 16:00 – Prezidente Repúblika, José Ramos-Horta kondekora ho órdem Grande Colár Timor-Leste ba Primeiru-Ministru Austrália Anthony Albanese iha salaun Xina.

Remata serimónia ofisiál sira iha Palásiu Prezidensiál, Estadu no Governu Timor-Leste sei oferese mós bankete han kalan amizade ba Primeiru-Ministru Anthony Albanese ho delegasaun iha Palásiu Nobre, Lahane, no sei iha mós aprezentasaun dansa kultura, múzika no mós resepsaun ofisiál sira seluk.

Reportajen ekipa Rafa.tl