A.D S.L.B Laulara Rekolla Pontu Tolu iha Jogu Daruak Grupu A Kontra Aitana F.C ho Skor 3-0

Ekipa A.D S.L.B Laulara manan Aitana F.C ho skor 3-0 iha jogu Taça da Liga 2025 iha Estádiu Munisipál Díli, Domingu (25/01/2026). Imajen/Rafa.tl

 DILI, RAFA.tl- Ekipa A.D S.L.B Laulara susesu rekolla pontu tolu iha jogu daruak grupu A hasoru Aitana F.C hafoin Makikit Laulara manán ho skor 3-0 no provizoriamente lidera tabela klasifikasaun grupu A ho pontu haat.

Notísia Relevante: F.C Lica-Lica Lemorai Susesu Halakon Fitun Estudante Lorosa’e F.C ho Skor 3-0

Iha jogu daruak ne’ebé hala’o iha Estádiu Munisipál Díli, Domingu (25/01/2026), ekipa A.D S.L.B Laulara susesu rekolla pontu tolu hafoin manán nia adversáriu Aitana F.C.

Ekipa rua hahú kedas jogu ida atrativu iha minutu dahuluk jogu hahú, ekipa A.D S.L.B Laulara ne’ebé antes ne’e rekolla de’it pontus ida iha jogu dahuluk kontra Emmanuel F.C iha ambisaun hakarak manán jogu ne’e. Ekipa rua kontinua joga ho disiplina no ida-idak manán ho tátika ne’ebé iha hodi buka oportunidade atu hatama uluk golu.

Ekipa Makikit Laulara no Aitana F.C mantein skor 0-0 iha primeira parte, tanba haré ba tátika jogu kuaze ida-idak defende nia área no halo jogu barak liu iha liña klaran no hein bola oportunidade mak foin joga sa’e hodi halo kontra atake.

Tama ba segunda parte, ekipa A.D S.L.B Laulara hahú hasa’e ritmu jogu hodi buka oportunidade ba hatama golu no tama ba minutu 50 jogadór A.D S.L.B Laulara, Luis Figo hatama uluk golu ida hodi muda skor ba 1-0.

A.D S.L.B Laulara kontinua halo atake ba Aitana F.C hodi buka meiu atu aumenta tan golu no tama ba minutu 55, jogadór A.D S.L.B Laulara Fever Duvan marka golu ida ba nia ekipa hodi muda skor ba 2-0.

Aitana F.C la hakmatek, hahú halo mudansa ba tátika no ritmu jogu ne’ebé iha hodi buka oportunidade, maibé nafatin falla tanba jogadór A.D S.L.B Laulara sira mantein disipliña no kalma hodi asegura pontus ne’ebé mak iha.

Tama ba minutu ikus segunda parte, kapitaun ekipa A.D S.L.B Laulara, Filomino Junior marka golu ida ba nia ekipa hodi muda skor ba 3-0, ho golu ne’e halo ekipa A.D S.L.B Laulara provizoriamente lidera grupu A ho pontu haat.

Teinadór Aitana F.C, Nataniel Reis hatete, maske nia ekipa lakon no sai ona husi jogu Taҫa da Liga ne’e, maibé nia koko atu manán iha jogu tuir mai hasoru Emmanuel F.C.

“Primeiru ami sente triste tanba ami lakon ho golu tolu,  ami nia lakon ida halo ami labele hakat ba faze tuir mai,  maibé hakarak hatete de’it, ami nafatin iha vontade ida katak, ami lakoi atu iha okos liu,  ami sei iha jogu ida, ami hakarak,  ami sai mos, sai ho dignidade, ami hakarak tur iha pozisaun daruak.” Hatete Nataniel Reis.

Treinadór, A.D S.L.B Laulara, Vicente Ramos afirma, vitória ho golu tolu ne’e akontese tanba liu husi mudansa tátika ne’ebé halo iha jogu segunda parte.

“Antes ne’e, ami iha planu ona, iha primeira parte la’ós ami la hetan oportunidade,  ami hetan, maibe la konsege halo golu, maibé iha segunda parte, ami muda fali, ami muda tátika ne’ebé ami hala’o iha treinu, ne’e mak ami konsege hetan golu tolu ne’e. Iha parte barak mak ami presija hadi’a, maibé iha treinu mak ami sei hadi’a,” Vicente Ramos hateten.

Atu hakat ba faze tuir mai iha Taça da Liga, A.D S.L.B Laulara sei hein jogu tuir mai entre Emmanuel F.C hasoru Aitana F.C iha loron 30 fulan-Janeiru 2026.

Reportajen Ekipa Rafa.tl