F.C Lica-Lica Lemorai Susesu Halakon Fitun Estudante Lorosa’e F.C ho Skor 3-0

F.C Lica-Lica Lemorai manan Fitun Estudante Lorosa’e F.C ho skor 3-0 iha jogu Taça da Liga 2025 ne'ebé hala'o iha Estádiu Munisipál Díli, Sábadu (24/01/2026). Imajen/Rafa.tl

DILI, RAFA.tl- F.C Lica-Lica Lemorai susesu halakon adversáriu Fitun Estudante Lorosa’e F.C ho skor 3-0 no provizoriamente lidera tabela klasifikasaun grupu C ho pontu tolu.

Notísia Relevante : Karketu Díli F.C Lidera Provizóriu Tabela Klasifikasaun Grupu D Hafoin Halakon As Marca ho Skor 3-1

Ekipa F.C Lica-Lica Lemorai no Fitun Estudante Lorosa’e F.C hanesan ekipa rua husi segunda divizaun ne’ebé partisipa mós iha Taça da Liga époka ne’e hodi kompete ho klubu seluk husi segunda no primeira divizaun.

Bainhira árbitru huu apitu sinál jogu hahú iha Estádiu Munisipál Díli, Sábadu (24/01/2026), ekipa F.C Lica-Lica Lemorai no Fitun Estudante Lorosa’e F.C, ida-idak halo kedas jogu tuir instrusaun husi treinadór sira no tátika ne’ebé iha durante treinu. Ekipa rua laiha ida mak superiór liu, maibé kada ekipa iha espíritu ne’ebé diferente atu manán jogu ne’e.

Ekipa F.C Lica-Lica Lemorai hahú hasa’e nia intensidade jogu no tama ba minutu 29 ekipa Fitun Estudante Lorosa’e F.C halo falta iha grande área laran, nune’e árbitru deside fó penalidade (penalty) ba F.C Lica-Lica Lemorai no Jogadór Mário de Jesus Panaun ne’ebé hetan fiar hodi ezekuta no konsege marka golu dahuluk liu husi penalidade hodi muda skor ba 1-0.

Jogu kontinua la’o no ekipa rua halo kontra atake ba malu maka’as liu husi kombinasaun ne’ebé iha, no tama ba minutu 38 F.C Lica-Lica Lemorai hetan tan oportunidade osan mean ida liu husi jogadór Rivaldo Correia ne’ebé marka golu ba nia ekipa hodi muda skor ba 2-0.

Ekipa rua mantein jogu to’o primeira parte termina, no F.C Lica-Lica Lemorai lidera provizoriamente ho skor ne’ebé iha.

Tama ba segunda parte ekipa rua kontinua halo kontra atake ba malu, no ekipa Fitun Estudante Lorosa’e F.C halo jogu ida agresivu liu atu duni oportunidade ne’ebé iha hodi bele hatama golu, maibé F.C Lica-Lica Lemorai mantein disiplina no asegura pontu ne’ebé iha.

Tama ba jogu ikus segunda parte nian, F.C Lica-Lica Lemorai kontinua halo presaun ba adversáriu Fitun Estudante Lorosa’e F.C nune’e iha minutu 90+3 jogadór Mário Panau susesu marka tan golu ida hodi muda skor ba 3-0.

To’o segunda parte termina laiha tan golu ruma akontese, nune’e ekipa F.C Lica-Lica Lemorai manán ho skor 3-0 no lidera provizoriamente tabela klasifikasaun grupu C ho pontus tolu no Fitun Estudante Lorosa’e F.C hela iha zona mean.

Treinadór F.C Lica-Lica Lemorai, Nelson Soares agradese ba estrutura tomak relasiona ho vitória ne’e no nia parte mos promete sei hadi’a performa jogu, atu nune’e bele manán iha jogu sira tuir mai.

“Lori estrutura FC Lica-Lica Lemorai nia naran hakarak agradese, tanba eventu ida ne’e iha para ita atu kontinua prepara nafatin ita nia jogadór sira. Ami hakarak hatete katak, joga ohin, ami iha ekipa haat ne’ebé ohin ami manán ida ne’e sai referénsia di’ak ba ami hodi bele hadi’a di’ak liután ami nia jogu iha jogu tuir mai,” Nelson Soares hateten.

Iha fatin hanesan, treinadór Fitun Estudante Lorosa’e F.C, Hermelo José Pereira afirma, maske lakon maibé nia ekipa sei esforsu fali iha jogu sira tuir mai, hodi bele hetan vitória.

“Ami lakon iha rezisténsia, kuandu rai ne’e manas, maibé ha’u sente ida ne’e la sai impaktu atu hamonu ami nia mentalidade, ami sei falta jogu rua tan, ami sei prepara aan di’ak liután hodi mai kompete fali iha Taça ida ne’e,” Hermelo José Pereira haktuir.

Tuir oráriu, Fitun estudante sei joga kontra Coraҫão F.C iha loron 31 fulan-janeiru ne’e, no F.C Lica-Lica Lemorai sei hasoru Porto Taibessi iha loron 07 fulan-Fevereiru, tinan ne’e.

Reportajen Ekipa Rafa.tl