Karketu Díli F.C Lidera Provizóriu Tabela Klasifikasaun Grupu D Hafoin Halakon As Marca ho Skor 3-1

Ekipa Karketu Díli FC. Imajen/Rafa.tl

DILI, RAFA.tl – Karketu Díli F.C lidera provizóriu tabela klasifikasaun grupu D, Taça da Liga 2025, hafoin iha jogu dahuluk halakon adversáriu As Marca ho skor 3-1.

Notísia Relevante: Karketu Díli F.C iha Ambisaun Boot Sai Kampiaun Taça da Liga 2025

Karketu Díli F.C ho naran Estimadu Matak Malirin ne’ebé iha ambisaun hakarak sai kampiaun ba Taҫa da Liga 2025 hahú jornada dahuluk iha jogu primeiru ho pontu tolu, hodi xave-metin ambisaun ne’ebé hakarak kampiaun Taça da Liga  ba edisaun dahuluk ne’e.

Iha jogu ne’ebé hala’o iha Estádiu Munisipál Díli, Sábadu (24/01/2026), ekipa Karketu Díli F.C no As Marca hatudu jogu ida atrativu no anima tebes adeptus sira ne’ebé ba asiste direta jogu iha Estádiu.

Karketu Díli F.C ne’ebé hanesan ekipa favoritu liu iha jogu ne’e, hatudu kedas superioridade iha minutu tolu liu husi jogadór Daniel Gayo ne’ebé marka golu dahuluk ba Karketu Díli F.C hodi muda skor ba 1-0.

Hafoin golu ne’e, jogadór As Marca sira la lakon vontade hodi hatudu jogu no hahú hadi’a naksalak sira iha kada liña hodi halo kontra atake ba Karketu Díli F.C.  no ekipa rua hasa’e intensidade jogu, nune’e halo kontra atake ba malu, no tama ba minutu 27 jogadór Karketu Díli F.C sira komete eru besik iha grande área, nune’e jogadór As Marca, Louis Anselmo ne’ebé hetan konfiansa hodi ezekuta bola falta ne’e susesu halo golu hodi muda skor ba 1-1.

Ekipa rua mantein ritmu jogu no Karketu Díli F.C sempre halo kontra atake ba As Marca maibé ekipa rua forsa hanesan nune’e to’o primeira parte termina laiha tan golu ruma akontese no obrigadu tenke fahe pontu hanesan.

Tama ba segunda parte, ekipa Karketu Díli F.C no As Marca ida-idak mantein nia pozisaun, ho plantel jogadór ne’ebé iha hodi buka oportunidade atu lidera jogu ne’e hodi lori vitória ba klubu.

Karketu Díli F.C kontinua halo jogu no hasa’e nia ritmu hodi buka oportunidade no tama ba minutu 75 liu husi bola kantu, Karketu Díli F.C konsege marka golu ida tan hodi muda skor ba 2-1 liu husi jogadór Anizo Correia.

Ho golu ne’e ekipa As Marca koko halo mudansa ba tátika no substituisaun ba jogadór sira hodi buka oportunidade atu halo impata, maibé tama ba minutu 90+5 tempu adisionál segunda parte nian, Karketu Díli F.C marka tan golu ida liu husi jogadór Yohanes Gusmão hodi muda skor ba 3-1 no to’o árbitru huu apitu jogu termina laiha tan golu ruma nune’e Karketu Díli F.C rekolla pontu tolu no tur iha primeiru klasifikasaun provizóriu grupu D.

Hafoin jogu termina, Jogadór Karketu Díli F.C, Danilo Gayo hatete, agradese ba adeptus sira ne’ebé fó ona sira nia apóiu másimu no promete sei manán tan jogu tuir mai.

“Agradese no obrigadu ba Maromak no adeptus sira, fó suporta ona ami no ami hetan pontu tolu ohin kalan ne’e.  Joga tuir mai sei hadi’a fallansu ne’ebé mak ohin ami hatudu iha kampu laran, rezisténsia mos ami ladún iha,  jogu tuir mai ami sei hadi’a liutan, ami sei ko’alia ho treinadór iha treinu no ami iha esperansa tomak sei manán iha Taça ne’e,” Danilo Gayo hateten.

Treinadór As Marca, Francisco Araújo, louva nia jogadór nia performa maske nia ekipa lakon  no nia parte konsidera derota ne’ebé iha fallansu husi jogadór sira nia konsentrasaun inklui fíziku.

“Ha’u orgullu ho jogadór ne’ebé mak iha, ida-rua mak iha naran, maibé jogadór mai ho nível ne’ebé mak lokál de’it, maibé sira hatudu jogu ne’ebé mak faiting spirit ne’ebé mak boot, duel individuál ne’ebé mak sira sempre manán, ida ne’e sai hanesan orgullu ida ba ha’u, maske skor golu ne’e hanesan númeru hodi difine ami derota iha jogu ida-ne’e ho 3-1 maibé golu sira ne’ebé mak husi adversáriu ne’e, golu ida mak erru detail ida ne’ebe mak jogadór sira presija hadi’a iha futuru, liu-liu iha konsentrasaun  iha jogu, fíziku komesa tun, ne’e mak ami tenke hadi’a, ita hotu hatene karketu mos manán ami la fásil, sira mos joga, ami mos joga,” Francisco Araújo argumenta.

Tuir oráriu As marca sei joga uluk hasoru  Santa Cruz F.C iha loron 1 fulan fevereiru no Karketu Díli F.C sei kontra Santa Cruz F.C iha loron 8 fulan-Fevereiru ne’e.

Reportajen Ekipa Rafa.tl