Kazu Abuzu Seksuál Koletivu, PNTL Tau Alzema no Detein Suspeitu Na’in-haat

Polísia kaptura suspeitu ba kazu abuzu seksuál koletivu ne'ebé viral iha mídia sosiál. Imajen/Rafa.tl

DILI, RAFA.tl – Polísia Nasionál Timor-Leste (PNTL), liu husi Diresaun Servisu Investigasaun Kriminál Nasionál (DSIKN) hamutuk ho ekipa sub-seksaun Vulnerable Person Unit (VPU) Munisípiu Díli, Sesta (23/01/2026),  ezekuta mandadu Tribunál Judisiál Primeira Instánsia Díli (TJPID) ho NUC:0017/26. DINFT hodi kaptura no halo detensaun ba suspeitu na’in-haat ne’ebé envolve iha kazu abuzu  seksuál koletivu hasoru vítima FCL ne’ebé virál iha mídia sosiál.

Notísia Relevante: Kazu Abuzu Seksuál Koletivu, Polísia Hein Mandadu Detensaun Ba Suspeitu JGP Ne’ebé Hala’o Estudu iha Indonézia

Suspeitu na’in-haat ne’ebé ekipa autoridade seguransa PNTL kaptura hodi detein iha sela Polísia ne’e ho inisiál JMPA, CON, JGFPS, ho GAAG.

Bainhira autoridade polísia to’o iha suspeitu sira ne’e nia hela fatin iha Díli laran, autoridade sira aprezenta uluk mandadu  husi Tribunál nian ba família no suspeitu kona-bá aktu ne’ebé suspeitu komete hafoin tau alzema ba sira-nia liman.

Autoridade seguransa  bolu reprezentante família tanba inan ho aman sai hela ho  ida  ne’e Polísia aprezenta mandadu Tribunál ba família informa ba família bele ba tuir iha Komandu Polísia Munisípiu Díli.

Hale’u tuku 11:55 Otl, Polísia halo kapturasuan uluk kedas ba suspeitu ida iha área STM Becora no tuir mai ba kedas kaptura suspeitu ida iha área Becora Amular.

Bainhira autoridade seguransa sira to’o iha suspeitu nia rezidénsia husu família koopera hodi hatudu suspeitu ba PNTL no aprezenta mandadu husi Tribunál ba suspeitu hafoin tau alzema.

PNTL mós kontinua kedas ba iha área Metiaut nian kaer tan suspeitu na’in-rua hale’u tuku 12:15 Otl. Suspeitu na’in-rua ne’e koopera no entrega aan ba Polísia, nune’e mos aprezenta mandadu Tribunál ba família.

Hafoin asegura suspeitu na’in-haat ekipa servisu transporta no entrega kedas suspeitu sira ba iha VPU (Vulnerable Person Unit) tutela Servisu Investigasaun Kriminál (SIK) Munisípiu Díli, hodi halo prosesu investigasaun kontinua detein iha sela polísia durante oras 72 molok submete ba Primeiru Interrogatóriu  iha Tribunál.

Komandante Polísia Munisípiu Díli, Superintendente Xefe Polísia Orlando Gomes ba jornalista sira hatete, PNTL hetan ona mandadu husi Tribunál atu halo ezekusaun ba kazu violasaun ho devasa ne’ebé mak akontese iha fulan-Novembru tinan kotuk, ne’ebé mak virál iha mídia sosiál.

“Suspeitu na’in-haan ne’e submete ona konstitui sira hanesan arguido,” Komandante PNTL Munisípiu Díli, Superintendente Xefe Polísia Orlando Gomes hateten.

Superintendente Xefe Polísia ne’e subliña, PNTL kontinua ezekuta mandadu detensaun husi Tribunál no karik iha tan prosesu seluk ka mandadu seluk mai komandu nafatin ezekuta tantu iha Indonézia ka iha ne’ebé PNTL nafatin halo kordenasaun atu bele ezekuta mandadu refere.

Reportajen ekipa Rafa.tl