Kazu Abuzu Seksuál Koletivu, Polísia Hein Mandadu Detensaun Ba Suspeitu JGP Ne’ebé Hala’o Estudu iha Indonézia

Polísia halo idneitifkasuan ba suspeitu sira ne'ebé envolve iha kazu abuzu seksuál koletivu ne'ebé viral iha média sosiál. Imajen/Média PNTL

DILI, RAFA.tl – Polísia Nasionál Timor-Leste (PNTL) kontinua husu ba Ministériu Públiku (MP) atu hasai mandadu detensaun ba suspeitu sira, kazu abuzu seksuál koletivu, liu-liu ba suspeitu ho inisiál JGP ne’ebé oras ne’e halo hela nia estudu iha  Indonézia.

Notísia Relevante: Kazu Abuzu Seksuál Koletivu, Polísia Husu Mandadu Detensaun MP Ba Suspeitu Na’in-Haat

Porta-voz interinu Komandu Jerál Polísia Nasionál Timor-Leste (PNTL), Superintendente Asistente Polísia Mouzinho Tavares Correia ba jornalista sira, Kinta (22/01/2026), informa bainhira despaixu mai ona Polísia, hafoin   kolabora ho adidu seguransa ho  Migrasaun Timor-Leste ne’ebé iha Indonésia atu buka suspeitu ho inisiál JGP repatria  mai tuir justisa iha Timor-Leste.

“Suspeitu ne’e ita identifka ona, se nia oan, hein bainhira mandadu sai, ita sei liu husi ita-nia kolega Migrasaun para hanusa haruka nia fila-fali mai, tanba nia sidadaun Timorense, nia nafatin kumpri Lei Timor-Leste nian. Kazu akontese iha ne’e, nia ema Timor-Leste, hakarak ka lakohi tenke mai hatán iha Timor-Leste,” Superintendente Asistente Polísia Mouzinho Tavares Correia esplika.

Superintendente Asistente Polísia ne’e haktuir, kazu ne’e akontese kedas iha tinan kotuk, hafoin publika fali iha mídia sosiál, tanba ne’e suspeitu asegura, bolu ona halo identifikasaun, haruka ona ba Ministériu Públiku atu foti medida ba karta mandadu.

Kazu ne’e aplika forma husi fragante de litu, tanba prosesu ne’e iha loron 20 fulan-Janeiru ne’e submete ona ba Ministériu Públiku, ho númeru prosesu NUC 001/26.DINFT, suspeitu identifikadu hotu, hakarak maneira sei uza haruka ema fila-fali mai, ne’ebé  bele kontaktu adidu seguransa  ho adidu migrasaun  iha ne’ebá atu haruka suspeitu inisiál JGP fila-fali mai tuir prosesu.

Parte PNTL mós sei hakle’an investigasaun ba tua ka alkólika ne’ebé suspeitu no vítima sira konsumu, nune’e bele hatene nia rezultadu.

Antes ne’e, Komandu Munisípiu Díli, bolu ona vítima sira hodi presta deklarasaun hodi  hein prosesu Ministériu Públiku atu foti prosesu hasoru suspeitu sira.

Tuir deklarasaun vítima nian katak, iha momentu ne’ebá vítima ba partisipa aifunan ida iha parte Becora, hafoin kolega sira lori vítima ba iha Aituri-laran Taibesi, hodi hetan esplorasaun sexuál koletivu ne’e.

“Tuir deklarasaun vítima nian katak, iha momentu vítima sai husi Aimutin atu ba hadér mate-uma ida iha área STM Becora, maibé to’o iha ne’ebá la kleur nia kolega bolu ba halimar  iha Aituri-laran,  depois mak suspeitu na’in haat ne’e mosu ba lori kedas ho tua sabu balun ho serveza lata ABC ho vítima sira hemu, depois vítima hamlaha fó osan ba nia kolega sosa hahán, maibé kalan boot ona la sosa depois iha fali dia 5 Novembru dadér nia kolega ba sosa hahán ne’e mak suspeitu na’in haat halo violasaun sexuál ba vítima,” Komandante Polísia Munisípiu Díli, Orlando Gomes informa.

Superintendente Xefe Polísia Orlando Gomes hatete, Polísia hahú buka tuir Id Fecebook  ne’ebé  publika vídeo sexuál koletivu hasoru vítima ne’e  iha mídia sosiál, tanba ne’e husu sidadaun hotu atu labele fahe tutan vídeo sira ne’e, presija respeita ema nia integridade.

Reportajen ekipa Rafa.tl