Projetu Drenajen Portu Díli ho Kustu US$2,323,826.66 Termina iha Outubru 2026

Traballadór sira halo hela servisu ba projetu konstrusaun drenajen iha Portu Díli. Imajen/Rafa.tl

DILI, RAFA.tl–Empreza Karya Timor ne’ebé konstrui drenajen ho kustu US$2,323,826.66  ho nia distánsia husi área edifísiu Polísia Sientifiku Investigasaun Kriminál  (PCIC, sigla portugés), Caicoli tun  to’o Portu Díli sei finaliza iha fulan-Outubru, tinan ne’e.

Iha termu kontratu ne’ebé empreza konstrutor Karya Timor, Lda  ho Governu, konsta katak,  medida drenajen ne’e ho nia naruk metru 408 ho durasaun tempu servisu tinan ida ka loron 365.

Enjiñeiru empreza Karya Timor, Claudino Conceição Soares, ba Rafa.tl iha área Portu Díli, Kuarta (21/01/2026), hateten, sira-nia empreza garante  projetu  drenajen ne’ebé halo hela  iha Portu Díli to’o iha Edifísiu PCIC  nian  ne’e sei finaliza iha fulan-Outubru 2026.

“Obra ida-ne’e, ami nia alvu tinan ida nian, ne’ebé ami esforsu katak iha fulan-Outubru, tinan ne’e, bele remata. Projetu ne’e kategoria emerjénsia, tanba durante ne’e ita haré katak dalaruma mosu inundasaun ne’ebé  barak, ne’ebé garante ho drenajen ida-ne’e hemenus inundasaun,” Claudino Conceição Soares hateten.

Enjiñeiru ne’e promete, estrada ne’ebé halo hela projetu  drenajen iha Portu Díli nian sei hotu iha fulan-Fevereiru, nune’e  sei loke fila-fali ba públiku hodi asesu.

“Estrada ne’ebé taka provizoriu iha Sporting nia oin no loke provizoriu ba transporte sira liu arredór Portu Díli nian sei termina iha fulan ida nian, katka iha filan-Fevereiru, Estrada bele loke fali ba públiku, depois kontinua ba leten. Agora dau-daun ne’e, ami atinji ona liu porsentu 20,” Claudino Conceição Soares esplika.

Nia  afirma, dezafiu sira ne’ebé durante  ne’e empreza infrenta maka klima, bainhira laloran tasi-boot ho udan maka’as tenke para servisu, tanba kondisaun la permite, tanba udan-been tun maka’ás no tasi-been mós sa’e maka’as.

Observasaun Rafa.tl iha terenu nota katak, durante projetu drenajen ne’e hahú mosu engrafamentu maka’as iha parte Otél Timor nia oin, tanba movimentu  transporte husi diresaun Mandarin, Igreja Motael no Colmera ba Palásiu Governu tenke liu husi dalan alternativu área Portu Díli nian.

Reportajen ekipa Rafa.tl