Emmanuel F.C ho AD SLB Laulara Fahe Pontu Hanesan iha Jogu Abertura Taҫa da Liga

Ekipa AD SLB Laulara iha jogu abertura Taça da Liga 2025 iha Estádiu Munisipál Díli, Sábadu (17/01/2026). Imajen/Rafa.tl

DILI, RAFA.tl– Ekipa Emmanuel F.C no AD SLB Laulara fahe pontu hanesan iha jogu abertura Taҫa da liga 2025 hafoin iha minutu 90 nia laran ekipa rua mantein ho eskor 0-0.

Lee Mós: Taça da Liga FFTL, Assalam F.C Preparadu no iha Ambisaun Rekolla Pontu Tolu Kontra DIT F.C

Iha jogu abertura Taҫa da Liga FFTL 2025 ne’ebé hala’o  abertura husi Primeiru-Ministru Kay Rala Xanana Gusmão no Prezidente Federasaun Futeból Timor-Leste (FFTL), Nilton Telmo Gusmão dos Santos iha Estádiu Munisipál Díli, Sábadu (17/01/2026), animadu tebes, tanba hahú ho animasaun konsertu muzikal,  husi banda Inferno no Alkatras,  inklui dansa kultura husi grupu Weliku Wehali no Lezeval.

Iha mós aprezentasaun bandeira taҫa da liga, inklui  aprezenta mós troféu taҫa da liga ba adeptu sira, liuhusi jogadór lendáriu José de Carvalho ne’ebe akompaña husi prezidente FFTL.

Ekipa Emmanuel F.C no AD SLB Laulara ne’ebé hahú jogu abertura ne’e iha animu no paixaun ne’ebé forte tanba iha Estádiu Munisipál Díli, nakonu ho komunidade hadomi futeból sira ne’ebé iha interese atu halo futeból iha Timor-Leste sai orgullu nasionál.

Tama ba jogu primeira parte, ekipa rua hahú kedas ho kontra ateke, liu husi tátiku no ritmu jogu ne’ebé ekipa rua ne’e iha. Treinadór Emmanuel F.C, Emiliano Ribeiru  “ARI”,   koko halo uluk presaun  ba liña defeza AD SLB Laulara, hodi buka oportunidade atu hatama uluk golu, maibé esforsu sira seidauk bele fó rezultadu tanba liña deveza AD SLB Laulara solidu hodi asegura oportunidade ne’ebé adversariu iha.

Ekipa AD SLB Laulara liu husi tátika no tekniku ne’ebé iha, halo óos kontra atake ba adversáriu liu husi jogadór estrela Mouzinho de Lima, maibé la hatudu rezultadu ruma.

Ekipa rua kontínua halo kontra atake ba malu maka’as, ho intensaun hakarak hatama uluk golu, hodi muda eskor iha tabela, maibe  rezultadu hatudu eskor 0-0 matein to’o jogu primeiru parte termina.

Hakat ba segunda parte, ekipa rua kontínua hatudu sira-nia jogu furak ho intensividade ne’ebé as, atu  bele hetan oportunidade hodi hatama golu no lidera iha tabela eskor nian, maibé la iha ida mak prodúz golu nune’e ekipa rua mantein ho eskor ne’ebé iha.

Iha minutu 60 ba leten, ekipa AD SLB Laulara liu husi tranzisaun tátika, hasa’e ritmu jogu iha liña klaran ho inisiativa halo kontra atake maka’ás hodi fó presaun ba área defeza Emmanuel F.C nian, maibé ekipa adversáriu mós antesipa ho diak atake sira, nune’e asegura sira-nia guarda rede husi bola ameasa sira.

Ekipa Emanuel F.C la hakmatek, halo mós kontra atake liu husi oportunidade no bola falta ne’ebé iha, maibé oportunidade hirak ne’e seidauk bele nakfilak ba golu no ekipa rua mantein ho eskor 0-0 to’o jogu termina.

Hafoin jogu, Asistente Treinadór Emmanuel F.C, Van Basten hateten iha jogu ne’e nia ekipa hetan oportunidade barak, maibé falla husi liña avansadu bainhira halo ezekusaun.

“Iha jogu  ne’e ami mós hetan oportunidade, maibé ami nia avansadu mak falla atu finaliza, entaun ami labele hetan golu, tanba ne’e ami sei hadi’a di’ak liu fali iha jogu tuir mai kontra Aitana FC,”  Van Basten  hateten ba jornalista sira.

Nia rekoñese katak sira-nia jogadór avansadu sira ladún kontribui másimu ba jogu ne’e no ne’e hanesan matéria ida  mai Emmanuel FC bele hadia fali di’ak liután iha jogu sira tuir mai,”  nia. Tenik.

Iha fatin hanesan treinadór AD SLB Laulara, Vicente Ramos konsidera ekipa Emmanuel F.C hanesan ekipa ne’ebé zigante tanba ne’e la fasil atu halakon no nia parte sei halo mudansa ba estratejia jogu hodi bele manan iha jogu tuir mai.

“Jogu ida-ne’e hanesan jogu primeiru depois ita haré rasik, jogu  ho intensidade ida ne’ebé aas.  Hau hanoin jogu primeiru ne’e jogu normal, Vicente Ramos hateten.

Tuir oráriu ba jogu tuir mai iha grupu A, AD SLB Laulara sei hasoru uluk ekipa Aitana F.C iha loron 25 fulan-Janeiru  ne’e no   Emmanuel F.C sei kontra ekipa Aitana F.C iha loron 30, fulan-Janeiru ne’e, hodi kompleta jogu sira grupu A nian no deside se mak iha direitu ba lidera tabela klasifikasaun no hakat ba faze tuir mai.

Reportajen ekipa Rafa.tl