Governu Prevé Rihun US$70 Ba Feira Nasionál iha Tasi-Tolu

Ministru Komérsiu no Indústria, Filipus Nino Pereira. Imajen/Rafa.tl

DILI, RAFA.tl– Governu liuhosi Ministériu Komérsiu no Indústria (MCI, sigla portugés), prevé osan hamutuk rihun US$70 hodi organiza no realiza feira nasionál iha resintu Tasi-Tolu hodi komemora tinan-50 loron proklamasaun independénsia, 28 Novembru 1975 – 28 Novembru 2025.

Ministru Komérsiu no Indústria, Filipus Nino Pereira, ba jornalista sira iha Parlamentu Nasionál, Kuarta (19/11/2025) hateten, IX Governu Konstitusionál liuhosi Ministériu Komérsiu no Indústria, forma ona  Komisaun Organizadora no halo ona rejista ba  grupu no empreza sira ne’ebé atu partisipa iha eventu espozisaun iha Tasi-Tolu hodi komemora loron Proklamasaun Independénsia ba dala-50.

Nia hatutan, governu iha komisaun Nasionál ne’ebé lidera husi Ministru Administrasaun Estatal (MAE), ne’ebé organiza eventu nível nasionál, no mos iha munisípiu sira, ba iha nível nasionál hola parte mós husi MCI ne’ebé sei organiza espozisaun.

“Ita prevé hela osan ho montante rihun US$70. Ita mós fó oportunidade ba ita-nia grupu inan-feton sira, ´’micro pequenas empresa’’ sira ne’ebé mak durante ne’e sai parseiru ho MCI atu sira sei hola parte iha espozisaun ne’e,” Ministru Nino Pereira hateten.

Governante ne’e esplika, espozisaun sei realiza iha semana ne’e ba to’o loron komemorasaun 28 Novembru, maibé Komisaun Oragnizadora sira kontinua rejista grupu no empreza sira, ne’ebé Komisaun Organizadora sira prepara hotu fatin kompletu ho tenda no ekipamentu sira hodi fasilita sira nia aktividade.

MCI informa mós katak bainhira espozisaun remata, sei kontinua kedas ho programa bazar baratu iha fulan-Dezembru.

“Programa bazar baratu komesa ona realiza iha Postu-Administrativu Laga, Munisípiu Baucau iha semana kotuk,” Nia informa.

Ministru Komérsiu no Indústria, Filipus Nino Pereira hatete, feira nasionál ne’e nakloke ba sidadaun hotu, no husu ema hotu nia partisipasaun ho responsabilidade hodi garante paz no estabilidade durante eventu ne’e la’o.

Reportajen Ekipa Rafa.tl