2027, Governu Loke Eskola Superiór Turizmu no Ótelaria iha Lospalos

Ministru Ensinu Superiór Siénsia no Kultura (MESCC, sigla portugés), José Honório da Costa Pereira Jerónimo. Imajen/Rafa.tl

DILI, RAFA.tl–Governu liuhosi Ministériu Ensinu Superiór Siénsia no Kultura (MESCC, sigla portugés),  iha tinan oin (2027),  loke Eskola Superiór Turizmu no Ótelaria iha Munisípiu Lautém hodi fó oportunidade ba estudante sira ne’ebé remata estudu iha nível sekundáriu bele kontinua estudu nível universitáriu iha ne’ebá.

Ministru Ensinu Superiór Siénsia no Kultura, José Honório da Costa Pereira Jerónimo hatete,  eskola foun ne’e sei hahú simu estudante foun hamutuk atus-ida, no kada aula akumula estudante  na’in-50.

“Tuir planu Ministériu nian hahú loke Eskola Superiór Turizmu no Ótelaria iha Lospalos, no ita nia planu sei simu estudante faze dahuluk ne’e hamutuk 100, no kada sala aula estudante na’in-50 mak iha laran,”   Ministru José Honório da Costa Pereira Jerónimo hateten iha ámbitu debate no aprovasaun Orsamentu Jerál Estadu (OGE, sigla portugés) iha Parlamentu Nasionál, Kuarta (19/11/2025).

VI Governu Konstitusionál haruka ona profesor hamutuk na’in-10 ba tuir formasaun iha área Turizmu no Ótelaria iha rai-liur no profesor na’in-11 mak sira lakohi ona servisu iha Ministériu, balun ba tiha liur no na’in-sia kontinua nafatin servisu iha ministériu.

Ho situasaun ne’e, Ministériu iha obrigasaun halo preparasaun ba sira iha tinan 2027 sei sai profesor iha Eskola Superiór Turizmu no Ótelaria iha Lospalos, tanba sira foti kursu ne’e ba ida ne’e duni.

Ministru  José Honório da Costa Pereira Jerónimo haktuir, iha tinan 2023 Governu mós haruka profesor  na’in-20 ba foti mestradu iha área turizmu iha Tailándia, ne’e mós  prepara hodi sira ba iha Lospalos, bainhira hahú loke Eskola Superiór Turizmu no Ótelaria iha ne’ebá.

“Tinan oin ita hahú halo ona konstrusaun ba aula hitu iha Eskola Nino Konis Santana, maibé ha’u kordena ona ho ministra edukasaun no mós sekretáriu estadu tékniku vokasional no ha’u rasik mós enkontru ho Prezidente Autoridade Munisípiu Lautém no diretór edukasaun Munisípiu Lautém nian, ne’ebé fatin konfirmadu. No fatin ba konstrusaun Eskola Superiór Turizmu no Ótelaria tau ona osan iha fundu infrastrutura ne’ebé hahú halo preparasaun iha tinan 2026 hafoin hadi’a tiha aula hitu, tinan 2027 simu ona estudante foun,” Nia subliña.

MESCC iha orsamentu Jerál Estadu tinan 2026, tau osan hamutuk rihun US$80 iha hodi halo reabilitasaun ba aula-hitu, prepara mós nia matéria no sasán sira atu nune’e bainhira loke buat hotu preparadu ona.

Iha tinan 2026 mós MESCC nafatin fó oportunidade bolsa estudu ba profesor sira, agora na’in-lima mak atu ba Malázia, bainhira sira ne’e fila sei forma sira hodi sai profesor iha Eskola Superiór Turizmu no Ótelaria iha Lospalos.

Iha Planu estratéjiku tinan 2010 to’o 2030 governu hanoin kedas halo buat sira ne’e, nune’e bele kuda ona espíritu nasionalizmu no patriotizmu ba joven sira, la’os halo de’it ba Lospalos oan de’it maibé ba Timor laran tomak.

Reportajen ekipa Rafa.tl