Autoridade Timor-Leste Asegura Xinés Ne’ebé Envolve iha Utiliza Pistola ho Kilat PNTL Treinu Tiru iha Kaitehu

Autoridade Timor-Leste liuhosi Servisu Migrasaun asegura sidadaun Xinés ho inisiál SD iha Aeroportu Internasionál Prezidente Nicolau Lobato, Tersa (18/11/2025). Imajen/Espesiál

DILI, RAFA.tl– Autoridade Timor-Leste liuhosi Polísia Servisu Migrasaun,  Tersa (18/11/2025), asegura sidadaun estranjeiru ida ho nasionalidade Xinés ho inisiál SD ne’ebé deskonfia envolve iha utiliza kilat ho pistola hodi treinu  tiru iha Kaitehu,  Munisípiu Liquiça, foin lalais ne’e.

Notísia Relevante: Konsellu Superiór Polísia Sei Foti Desizaun Ba Membru CSP Fó Pistola ho Kilat Ba Ema Estranjeiru Tiru iha Kaitehu

Suspeitu ba kazu krime utiliza pitola ho kilat ne’ebé faislita husi membru Korpu Seguransa Pesoál (CSP, sigla portugés)  ida ne’e tenta halai sai ba estranjeiru ka fila ba nasaun orijen liu husi Aeroportu Internasionál Prezidente Nicolau Lobato, Comoro, Dili.

Porta-voz PNTL, Superintendente Polísia João Belo dos Reis ba Rafa.tl  liuhosi telefone konfirma katak,  parte Servisu Migrasaun asegura ona sidadaun Xinés ne’e iha Aeroportu Internasionál Prezidente Nicolau Lobato hodi lori nia mai iha Komandu Jerál PNTL iha Diresaun Servisu Investigasaun Kriminál (DSIK) hodi halo notifikasaun hasoru nia aktu.

“Tanba nia iha hela rejistu, kazu krime ne’e la’o hela, entaun ita sei bolu nia foti tan informasaun balun, relasaun ba  saida mak akontese tiha ona. Migrasaun detein, agora bolu ona atu foti informasaun, ne’ebé sei notifika de’it ba buat ne’ebé mak nia halo, tanba ne’e ita sei konsulta nafatin  ho prosesu hotu-hotu ho Ministériu Públiku, saida mak ita halo tuir orientasaun Ministériu Públiku fó ba ita,” Superintendente Polísia João Belo dos Reis informa hodi responde Rafa.tl

Autoridade  Migrasaun lori ona sidadaun Xinés ho inisiál SD  ba Komandu Jerál PNTL, hodi entrega ba Polísia Diresaun Servisu Investigasaun Kriminál hodi halo prosesu notifikasaun, atu  aprezenta ba Ministériu Públiku.

Antes ne’e, Porta-voz interinu Komandu Polísia Nasional Timor-Leste (PNTL), Superintendente Polísia Mouzinho T. Coreia, ba jornalista sira iha Ministériu Interiór hateten, membru CSP ne’ebé fasilita sidadaun Xinés ho arma hanesan kílat ho marka M-Five (M5) no Pistola Glock 19 hodi treinu iha fatin tiru Kaitehu, Komandu PNTL hola ona medida hodi fó suspensaun durante loron 30 no kazu ne’e rasik submete ona ba Ministériu Públiku hodi halo prosesu tuir lei ne’ebé vigora.

Reportajen ekipa Rafa.tl