Governu Halo Esforsu Rezolve Problema Falta Blanku BI no Sertidaun RDTL

Tanba seidauk iha Blanku, Notariadu kontinua atribui Sertidaun RDTL provizóriu uza suratahan HVs ho media A4. Imajen/Rafa.tl

DILI, RAFA.tl– Governu liuhosi Ministériu Justisa (MJ) halo esforsu  hodi rezolve problema falta blanku ba kartaun Billete Identidade no sertidaun RDTL tuir programa no orsamentu ne’ebé iha.

Ministru Justisa, Sérgio de Jesus Fernandes da Costa Hornai ba Rafa.tl iha Parlamentu Nasionál, Sesta (07/11/2025) hateten, governu sempre halo esforsu hotu no bainhira sidadaun sira ba trata sertidaun RDTL ho Billete Identidade la iha razaun atu dehan la iha.

Kada tinan, Ministru Sérgio Hornai hateten, governu tau orsamentu ba halo akizisaun ba blanku BI, sertidaun RDTL no pasaporte hodi fó solusaun ba dokumentu hotu ne’ebé maka sai husi Ministériu Justisa nian.

“Governu dadaun ne’e halo esforsu hela atu rezolve sidadaun sira nia preokupasaun, no la iha mós interupsaun ba blanku laiha. Funsionáriu sira tenke servisu ho prestasaun ne’ebé di’ak, labele abandona sidadaun sira nia preokupasaun,” Ministru Justisa Sérgio de Jesus Fernandes da Costa Hornai hateten.

Governante ne’e mós husu ba funsionáriu sira iha Diresaun Rejistu Notariadu atu hatudu prestasaun servisu ne’ebé maka di’ak, no tenke la’o tuir orientasaun governu nian ho vontade tomak atu servi sidadaun iha rai ida ne’e.

MJ seidauk detekta iregularidade  iha notariadu

Ministru Justisa, Sérgio de Jesus Fernandes da Costa Hornai hateten, to’o agora seidauk detekta iregularidade iha servisu Notariadu no la iha razaun atu admite “broker” buat ida ne’ebé la iha relasaun ho interese públiku nia, administrasaun públika atu jere iha relasionamentu ba interese públiku.

“Bainhira ema ruma kompromete an ba atividade ida ne’ebé iha iregularidade, ilísitu tenke hola medida, ita iha dirijente sira, kargu xefia, xefe departamentu, Diretór Nasionál, Diretór Jerál, inspetor sira, sira iha fatin para atu halo kontrolu,” Ministru Sérgio de Jesus Fernandes da Costa Hornai afirma.

Nia informa, governu iha aparellu atu halo fiskalizasaun, atu halo kontrolu, atu halo vijilánsia atu bele detekta pesoál sira ne’ebé kompromete-an ba iha aktu iregularidade sira.

Durante mandatu IX Governu Konstitusionál iha duni razaun atu halo adverténsia bainhira nia komete, bainhira pesoál ida halo sirkunstánsia balu ne’ebé justifika, nia envolvimentu bele hola medida suspensaun máximu, kuandu labele liu, tenke hato’o ba iha Ministériu públiku, tanba nia envolvimentu iha responsabilidade kriminál.

“Enkuantu to’o ona agora Ministériu Justisa rasik seidauk detekta pesoál sira ne’ebé komete aktu iregularidade iha servisu administrasaun públika espesiál iha Ministériu Justisa,” Nia subliña.

Ministériu Justisa sei nafatin halo vijilánsia másimu ba iha funsionáriu sira no pesoál sira ne’ebé iha tentativa hakarak baralla sistema administrasaun no fo prejuízu ba estadu.

Reportajen ekipa Rafa.tl