Suspeitu Tá Kotu Nia Feton Nia Liman iha Ona Prizaun Preventiva

Família sira evakua vítima ba ospitál hodi hetan tratamentu intensivu. Imajen/Espesiál

DILI, RAFA.tl – Portavós Interinu Komandu Jerál Polísia Nasionál Timor-Leste (PNTL), Superintendente Asistente Polísia Mozinho T. Correia, informa  suspeitu ho inisiál GG ne’ebé tá kotu nia feton rasik nia liman iha parte karuk to’o kotu kumpre ona prizaun preventiva.

Nia hateten, foin lalais ne’e Tribunál Justisa Primeira Instánsia Baucau aplika  ona prizaun preventiva ba suspeitu ho insiál GG.

Kazu tá ne’e akontese iha Suku Luca, Postu Administrativu Lacluta, Munisípiu Viqueque, iha ne’ebé envolve sidadaun mane ida ne’ebé nu’udár suspeitu ho inisiál GG, tá nia feton rasik nia liman to’o kotu, nune’e parte PNTL asegura ona suspeitu no lori ona bá kumpri prizaun preventiva hodi hein prosesu sira tuir mai.

“Iha asaltu entre família uma-laran, suspeitu ho  inisiál GG tá kotu nia feton rasik nia liman, akontesimentu ne’e akontese iha Munisípiu Viqueque, kazu ida ne’e Polísia Nasionál Timor-Leste prosesa ona iha loron 04 fulan-Novembru no aprezenta suspeitu ba primeiru interrogatóriu iha Tribunál Justisa Primeira Instánsia Baucau hodi hetan prizaun preventiva, no vítima sei halo tratamentu iha Ospitál Referál Baucau,” Superintendente Asistente Mouzinho T. Correia ba jornalista sira iha Díli, Kinta (06/11/2025).

Superintendente Asistente Polísia ne’e esplika, tuir investigasaun polísia nian ba kazu maun tá nia feton nia liman to’o kotu ne’e tanba de’it dezentendimentu entre  suspeitu ho vítima, maibé la’ós tan hadau malu rai.

“Investigasaun Komandu PNTL Munisípiu Viqueque halo ne’e dezentendimentu entre uma-laran, suspeitu ho nia feton, laiha motivu seluk, ne’ebé simplesmente akontese dezentendimentu kona-bá hadau malu rai ne’e lalós ida,” Nia haktuir.

Kona-bá kazu asalta malu iha Postu Administrativu Venilale, Munisípiu Baucau, rezulta estraga motorizada ida, ho oknum  militár ne’ebé deskonfia mobiliza joven baku rahun uma iha Queliqai, no mós dezentendimentu membru Polísia ho militár iha Baucau, inklui kazu militár ida baku sidadaun ida iha Malilait Munisípiu Bobonaro ne’e iha ona  prosesu investigasaun.

Tuir relatóriu Komandu Jerál PNTL durante selebrasaun finadu, PNTL rejista  kazu insidente ka krimi sira hahú husi loron 27 fulan-Outubru to’o loron 02 fulan-Novembru tinan 2025 hamutuk 84 iha tipu lima,  violénsia doméstika iha 34,  asaltu 22, asaltu sexuál 5,  estraga propriedade 5, no furtu 5.

Ba kazu asidente tráfiku ne’ebé akontese husi Karreta ho motór hamutuk iha 39, rezulta ema mate na’in-lima (5), kánek todan na’in-lima (5) no kánek kamán 40.

Reportajen ekipa Rafa.tl