MS Investiga Hela Kazu Deskonfia Mal-Prátika iha Sentru Saúde Liquiça To’o Bebé Ida Lakon Vida

Vise-Ministru Saúde ba Fortalesimentu Instituisionál, José dos Reis Magno. Imajen/Espesiál

DILI, RAFA.tl– Ministériu Saúde (MS) halo hela investigasaun ba kazu deskonfia mosu mal-prátika iha Sentru Saúde Liquiça ne’ebé resulta bebé ida lakon vida hafoin hetan vasina husi estajiadu sira iha sentru refere.

Iha Kinta, 30 fulan-Outubru 2025, mosu akontesimentu ida ne’ebé viral iha mídia sosiál relasiona ho inan ida ne’ebé lori nia oan ho idade fulan-ida semana-rua, ba simu vasina iha Sentru Saúde Liquiça, no iha ne’ebá pesoál saúde estajiadu mak fó vasina no liu de’it loron ida bebé ne’e lakon vida, deskonfia kauza husi vasina ne’ebé nia simu.

Vise-Ministru Saúde ba Fortalesimentu Instituisionál, José dos Reis Magno, ba jornalista sira iha Palásiu Governu, Dili, Tersa (04/11/2025) hateten, Ministériu Saúde fó ona orientasaun ba ekipa sira atu halo investigasaun kle’an kona-ba motivu lolós husi akontesimentu ne’e.

“Agora iha hela investigasaun, ha’u fó ona orientasaun para sira halo investigasaun, no investigasaun la’o hela,” Vise-Ministru José dos Reis Magno.

Vise-Ministru haktuir, akontesimentu ne’e akontese bainhira ekipa eventu de imunizasaun (EADI) halo imunizasaun ne’ebé pesoál saúde sira halo ba labarik hamutuk 16, no liu tiha minutu balu ran sai fali husi sangra fatin no família sira halo kedas intervensaun ba parte médiku sira, iha Sentru Saúde Liquiça, no kontinua kedas halo transferénsia bebé ne’e mai iha Ospitál Nasionál Guido Valadares (HNGV sigla portugés) to’o iha HNGV maka nia hakotu iss.

Akontesimentu ne’e akontese, família hotu la kontente ho aktu ida ne’e, tanba ne’e Ministériu Saúde nafatin tenta kazu ida ne’e ba oin, tanba pesoál Saúde sira mós lakohi ema ida atu lakon vida, tanba kazu mal-prátika.

Ho akontesimentu ne’e, ekipa Ministériu Saúde sei tun ba terrenu hodi rekolla informasaun sira husi parte família, Sentru Saúde Liquiça no Ospitál Nasionál Guido Valadares hafoin bele publika rezultadu.

“Ha’u fó hatene hela ba sira para sira tun hela ba, tanba sira hatete katak iha relatóriu balu, sira presiza atu hetan tan informasaun husi HNGV, no mós tenke iha relatóriu por eskrita husi xefe sentru saúde Liquiça ho família,” nia tenik.

Nia subliña, husi parte Ministériu rasik seidauk bele hola medida ruma ba kazu refere, tanba sei hein investigasaun kle’an husi akontesimentu refere.

Enkuantu bebé ne’e nia identidade ho inisiál GSN ho idade semana neen ka fulan ida orijinalidade husi Munisípiu Liquiça.

Reportajen ekipa Rafa.tl