Orasaun Mak Ai-han Lolos Ba Matebian Sira Klamar

Família sira lori aifunan ho lilin kari no sunu iha semitériu sira hosi selebra loron matebian ka finadu. Imajen/Rafa.tl

BAUCAU, RAFA.tl– Uma Kreda kada tinan fó tempu espesiál atu ema moris sira reza missa no halo orasaun ba matebian sira tanba orasaun mak ai-han lolos ba klamar sira.

Notísia Relevante: Loron Matebian: Husu Ba Maromak Deskansu Rohan-Laek Ba Matebian Sira-Nia Klamar

Pe. Bazilio Freitas, iha nia omília ba selebrasaun missa matebian iha Kapela Dom Bosco, Belavista, Baucau, Domingu (02/11/2025) hateten, sira ne’ebé mate ka ba ona mundu seluk hanesan ema fiar nain, durante iha sira-nia moris tomak sira luta ba hetan ona Maromak Nia gloria no ohin ba oin sira pertense ona ba Nai Maromak. Tanba ne’e, kontinua reza nafatin ba matebian sira, hodi nu’uné sira sai hanesan embaixadór Maromak Nia, atu saida mak ita husu husi sira, sira sei hato’o ba Maromak no Maromak fó hikas ba ema nu’udár anju da guarda ba família sira ne’ebé sei moris iha mundu ne’e.

“Kuandu ita haluha matebian sira, la reza ba sira, bele dehan katak sira hamlaha, ka sira la hetan fiar atu kontínua sira-nia viajen, atu ba hasoru Nai Maromak. Tanba ne’e kontinua reza ba sira, atu sira hetan ai-han lolos ba moris rohan laek,” Pe. Bazilio Freitas hateten.

Padre selebrante ne’e haktuir, lilin ho aifunan ne’ebé maka ita oferese ba matebian sira iha loron finadu, ida-ne’e hanesan sinal domin no partisipasaun Eukaristia maka forsa boot ba matebian sira, tulun sira atu atu ba partisipa iha Maromak Nia reinu.

Interseisaun ida-ne’e, no simu komiñaun ida-ne’e ho intensaun ba maluk matebian sira, liu husi komiñaun ida-ne’e konsidera katak sira ne’e pertense ona iha Maromak Nia reinu. Fizikamente sira la hamutuk ho ita iha selebrasaun missa, maibé espiritualmente sira nafatin horik ho família sira-nia sorin iha selebrasaun missa.

“Ita kna’ar importante fiar nain mak ita husu ho fuan ho laran, ho fiar tomak ho devosaun tomak ba Maromak, ba ita-nia maun-alin matebian sira,” saserdote ne’e hateten.

Amu-lulik ne’e mós kontínua husu ba família sira ho fuan ho laran hamutuk ho matebian sira no kontínua hanoin hikas sira nia memoria durante ne’e, fó omenazen ba sira, hanesan iha leitura hateten katak, hakerek sira-nia naran iha besi riti ka besi kroat atu keta lakon no kontinua reza ba sira atu Maromak rekompensa sira-nia sala sira hodi sira bele haksolok nafatin iha reinu Lalehan.

Iha observasaun Rafa.tl iha simitériu Kailara hatudu, katak família hotu-hotu lori aifunan ba kari no lilin ba sunu iha rate ba matebian sira hodi hamulak tuir ritual kulturál ne’ebé iha.

Iha serimónia kari aifunan lao ho diak no mantein kalma no la iha akontesimentu ruma akontese iha simitériu refere.

Familia sira mós selebra loron matebian ne’e iha rate hanesan han-hemu tuir tradisaun Timor nian.

Reportajen ekipa Rafa.tl