Loron Matebian: Husu Ba Maromak Deskansu Rohan-Laek Ba Matebian Sira-Nia Klamar

Amu Pároku Parokia Imaculada Conceição, Katedral Dili, Pe. Paulos Maia. Imajen/Rafa.tl

DILI, RAFA.tl– Kada tinan iha kalendáriu liturjikál nian, iha loro 02 fulan-Novembru nu’udár loron ba matebian sira. Iha loron ne’e, sarani hotu sei reza misa hamutuk hodi husu ba Maromak deskansu rohan-laek ba matebian sira-nia klamar, liuliu sira ne’ebé sei iha Purgatóriu.

Amu Pároku Parokia Imaculada Conceição, Katedral Dili, Pe. Paulos Maia iha selebrasaun eukaristia ba matebian sira husu atu sarani sira kontinua reza no halo orasaun ba matebian sira nia klamar, liu-liu ba sira ne’ebe sei terus iha fatin purifikasaun nian atu sira hetan grasa no bensaun ne’ebé sira presiza iha sira nia estadu de vida oras ne’e dau-daun.

Saserdote ne’e esplika, loron ida ohin (02 Novembru) atu hanoin hikas ba matebian sira hotu, liuliu ba matebian sira ne’ebé terus hela iha fatin ka estadu da vida purifikasaun ninian ka fatin hamós an nian atu bele hetan ksolok rohan laek iha Na’i Nia Kadunan Santu.

Sarani sira hanoin matebian sira ne’ebe horik ona hamutuk ho Maromak, husu sira nia harohan daet. Atu tama Lalehan presiza hamós an tanba iha Lalehan laiha sala ida iha ne’ebá maibé buat hotu moos.

“Ohin loron matebian nian, matebian sira presiza ema nia orasaun atu hamós an hodi hakat ba estadu de grasa, atu hasoru Maromak oin ho oin hanesan sagrada eskritura haktuir. Hasoru Maromak laiha sala, entaun ida esperansa ne’ebé ita tau iha ita-nia orasaun ba rahundiak matebian sira ne’ebé mak hela iha fatin purifikasaun nian,” Pe. Paulos Maia iha nia omilia bainhira preside missa loron matebian nian iha Igreja Katedral Dili, Domingu (02/11/2025).

Pároku ne’e hatutan, iha eukaristia ida-ne’e atu reza ba sira hodi hetan hakmatek no tulun sira hodi hakman sira nia susar iha tempu hamoos an ninian no mós ba sarani sira ne’ebé fiar nain presiza mós reflete ba misteriu ida ne’e.

Sarani sira ne’ebé iha rai ne’e hanesan lao rai ka halo hela peregrinasaun no loron ida sei to’o iha ksolok rohan laek hamutuk ho Maromak maske moris iha rai, maibé neon ne’e hanoin katak loron ida  sei to’o iha uma rohan laek, ne’ebé Maromak promete ba sarani sira hodi laran-metin ba salvasaun ida-ne’e.

“Nai Jesus ne’ebé hamenu ba Apostulu sira katak Nia ba prepara fatin, no ho Nia mate, Nia manan mate ho moris hias, tanba ne’e ita hotu iha esperansa katak loron ida ita sei hetan moris hias tanba ita ne’ebé moris iha Kristu, moris tuir Kristu, loron ida ita sei mate, maibé esperansa moris hias nian mak halo ita ba horik hamutuk ho Kristu,” saserdote ne’e tenik.

Ho fiar ida ne’e mak Jesus  loke ema nia laran atu selebra ema nia fiar ho laran mós tuir Kristu nia hakarak rasik,  Jesus dehan hakbesik ba Nia sira ne’ebé susar no terus hodi simu iha nia ukun no nia naha atu sente no lao tuir Maromak ninia ukun.

Pe. Paulos Maia subliña katak presiza haklean liután fiar bainhira  reza ba matebian sira, husu grasa hamoos an ninia ba sira ne’ebe moris terus hela iha purgatoriu, atu hetan rahun diak iha sira nia klamar maibé ita rasik mós hametin ita nia fiar ho ita nia kompromisu no fiar hodi hamós ita-nia an mós iha rai ida ne’e.  Hadia ita nia an, konsiente ita nia dalan nu’udár Maromak oan hodi servi an, servi Maromak no servi ema seluk.

Reportajen ekipa Rafa.tl