Outubru 2026, Xanana Enfrenta Empreza Lighthouse iha Tribunál Supremu Victória

PM Kay Rala Xanana Gusmão. Imajen/Rafa.tl

DILI, RAFA.tl– Primeiru Ministru (PM), Kay Rala Xanana Gusmão, hateten posivelmente iha fulan-Outubru tinan 2026, sei ba hatán direta ba kazu Lighthouse iha Tribunál Supremu Victória-Melbourne iha Austrália, tanba ne’e lalika ta’uk.

Notísia Relevante: Estadu Timor-Leste Prontu Enfrenta Lighthouse To’o Hetan Desizaun Finál iha Tribunál

Primeiru Ministru, Kay Rala Xanana Gusmão, ba jornalista sira hafoin hasoru malu ho Prezidenti Repúblika, José Ramos-Horta iha Palásiu Prezidensial, Kinta (23/10/2025) hateten, kona-ba Lighthouse ne’e prepara hela no sei bolu advogadu foun hodi ba hatán iha fulan-Outubru tinan oin, no nia rasik mós ba responde iha tribunál Victória nian.

“Ne’e prepara hela ami bolu advogadu foun sira kaer hela ida ne’e no posivelmente iha fulan-Outubru, tinan mai ne’e, ha’u mak ba responde mós iha Tribunál Victória-Melbourne nian, lalika ta’uk tanba botamak ida uluk kaer Lighthouse ne’e Governu Austrália rasik mak dehan maior fraude lento iha Austrália laran ne’ebé lalika ta’uk,” Xanana Gusmão hateten.

Bainhira jornalista sira husu, se empreza Lighthouse manan Timor-Leste iha tribunál, oinsa estadu atu selu indemnizasaun sira ne’ebé ho montante boot ne’e? Xefe Governu dehan, sira labele manan, no agora seidauk esplika buat hotu maibé fiar katak estadu Timor mak sei manan.

“Sira labele manan, ha’u agora seidauk bele esplika buat hotu-hotu, mais sira manan oinsa, ha’u labele esplika, agora hein no fiar de’it katak sira atu manan ita hmmmm…” Xanana Gusmão subliña.

Primeiru-Ministru argumenta, pozisaun Governu Timor-Leste nian liu-hosi komunikadu imprensa iha tempu ne’ebá haktuir katak iha kontratu vinkulativu ne’ebé asina ho empreza Austrália hodi nota katak desizaun supremu tribunál nian “tuir tentativa ne’ebé falla husi Lighthouse iha tinan 2015 hodi halo desputa ne’e hetan julgamentu husi rezolusaun internasional ba desputa investimentu sira (ICSID) ne’ebé determina katak nia laiha kompeténsia atu julga kazu ne’e.

Iha tempu ne’ebá, tribunál ne’e hetan katak nia laiha kompeténsia ba desputa ne’ebé iha kestaun hodi responsabiliza Lighthouse Corporation ba kustu total prosesu arbitrajen  nian “inklui kustu tribunál nian”no selu Timor-Leste liu milaun US$1,5 ( Euro milaun 1,3) “relasiona ho kustu no despeza legal sira”.

Reportajen ekipa Rafa.tl