Arsebispu Jung Soon Taek Pedro ho Pároku 16 husi Korea-Súl Hasoru PM Xanana

PM Xanana Gusmão halo enkontru ho Arsebispu Korea-Súl, Jung Soon Taek Pedro hamutuk ho Pároku 16 husi Korea-Súl iha Pálasiu Governu, Segunda (13/10/2025). Imajen/Rafa.tl

DILI, RAFA.tl– Arsebispu Korea-Súl, Jung Soon Taek Pedro hamutuk ho Pároku 16 husi Korea-Súl  hamutuk ema na’in-12 hasoru malu ho Primeiru-Ministru (PM), Xanana Gusmão,  ne’ebé akompaña husi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, hodi hametin fraternidade umana entre país rua no fó solidariedade ba Timor-oan sira, liu-liu traballadór sira ne’ebé enfrenta difikuldade iha Korea-Súl.

Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, ba jornalista sira iha Palásiu Governu, Dili, Segunda (13/10/2025) hateten, vizita kortezia ida ne’e hanesan momentu ida ne’ebé Governu Timor-Leste no líder Igreja Katólika husi Korea-Súl fahe ideia ba malu hodi hamenus problema ne’ebé maka joven Timoroan sira sempre hasoru iha Korea-Súl.

Arsebispu Korea-Súl ho delegasaun hamutuk ema na’in-12, husi Parókia 16 ne’e maka durante ne’e apóiu espirituál no morál ba Timoroan sira bainhira presiza iha Korea-Súl.

Durante ne’e sira nia párokia sempre loke odamatan ba Timoroan sira hodi haklaken sira-nia fiar hanesan sarani Katólika no hato’o mós problema ne’ebé traballadór Timoroan iha Korea-Súl hasoru no fó solusaun ba difikuldade ne’ebé Timor-oan sira enfrenta iha Korea-Súl.

“Durante ne’e sira sempre atende problema saida deit maka Timor-oan sira enfrenta inklui problema pasaporte, problema saúde, problema família no mós problema espsiál sira seluk,” Mariano Asanami Sabino haktuir.

Governante ne’e hatutan Korea-Sul, liu-liu Arsebispu no Pároku sira ne’e, nafatin iha kompromisu ho fuan atu apoiu Timor-Leste, apóiu solidariu, apóiu hanesan fraternidade umana entre Timor-Leste ho Korea-Súl.

Antes ne’e, Mariano Assanami mós ba vizita ona traballadór Timor-oan sira iha Korea-Súl no hasoru direta mós kompañia sira ne’ebé maka oferese servisu ba Timor-oan sira.

Iha fatin hanesan, Arsebispu Jung Soon Taek Pedro hateten, iha vizita kortezia ne’e atu diskute kona-bá problema sira ne’ebé maka traballadór sira enfrenta iha Korea-Súl, oinsá iha futuru bele minimiza problema sira ne’e.

“Ami deskute mós kona-bá metodu saida maka governu rua tenke uza, atu nune’e Timor-oan sira ne’ebé passa ona iha ezame lian Korea bele aselera lalais ba Korea-Súl, tanba dalabarak sira passa tiha iha ezame, maibé prosesu atu ba servisu kleur liu,” Arsebispu Jung Soon Taek Pedro hateten.

Líder Igreja Katólika  Korea-Súl ne’e hatutan, sira mós diskute kona-bá Timor-oan sira ne’ebé servisu iha Korea-Súl ho dalan ilegal, nune’e husu ba Governu atu tau atensaun másimu ba sira hodi nu’uné labele taka dalan ba Timor-oan sira seluk ne’ebé iha mehi hakarak atu ba servisu iha Korea-Súl.

Durante estadia iha Timor-Leste, delegasaun Arsebispu Korea-Súl ne’e mós sei hasoru malu ho Arsebispu Metropolitana Dili, Dom Virgílio Kardeál do Carmo da Silva, SDB, hodi ko’alia asuntu uma-kreda nian.

Reportajen ekipa Rafa.tl