Tribunál Aplika Medida Koasaun Aprezentasaun Periódika no Garantia US$10,000.00 husi Arguidu Jogu Online

Arguidu ba atividade jogu online iha Zita Plaza ho Colmera aprezenta aan ba órgaun polisiál, foin lalais ne'e. Imajen/Rafa.tl

DILI, RAFA.tl– Liuhosi  julgamentu primeiru interogasaun, Domingu (12/10/2025), Tribunál Judisiáriu Primeira Instánsia Dili (TJPID), hatun despaxu hodi aplika medida koasaun aprezentasaun periódika no garantia osan ho montante US$10,000.00 ba arguidu na’in-10 ne’ebé envolve iha prátika jogu online ilegál iha Zita Plaza ho iha Colmera.

Notísia Relevante: PNTL Halo Buska no Apreensaun Ba Operadór Jogu Online Rua iha Dili no Detein Sidadaun Estranjeiru na’in-10

Despaisu Tribunál iha julgamentu primeiru interogasaun ne’e aplika mós proíbisaun  aujénsia hodi garante hela osan kada arguidu ho montante US$1,000.00 no ba arguidu na’in-10 hamutuk US$10,000.00.

Arguidu na’in-10 ne’ebé maioria sidadaun estranjeriu ho nasionalidade Xina no Malázia ne’e iha obrigasaun lei atu halo aprezentazaun  periódika, semana ida dala rua, iha estasaun polísia ne’ebé besik.

Iha  alegasaun Ministériu Públiku promove bá Tribunál hodi aplika Prizaun Preventiva bá  arguidu na’in-10. Enkuantu, parte Defeza husu Tribunál  atu halo medida koasaun, no aprezentasaun periódika kada semana dala-rua ho  koasaun garantia osan $10.000,00 ba arguidu  na’in-10 atu la bele sai husi teritóriu nasionál.

Hafoin  primeiru interogasaun asistidu bá arguidu na’in-10, Advogadu Privadu Napoleão de Oliveira Carvalho ba jornalista sira hateten medida koasaun ne’e hanesan garantia ba prosesu tanba  arguidu sira ne’e sidadaun estranjeiru.

“Karik  Arguidu sira halai husi Timor, konserteza koasaun Tribunál la bele fó fila, tanba koasaun ne’e osan tenke ba Estadu, tanba koasaun ne’e hanesan ipoteka ida hodi asegura prosesu ne’e nia andamentu,”  Advogadu Napoleão de Oliveira Carvalho hateten  iha resintu TJPD.

Advogadu ne’e konsidera desizaun Tribunál nian ne’e dekuadu ka justu bá ema ema ida-ne’ebé maka simu, maibé la justu ba ema ne’ebé la simu.

Reportajen ekipa Rafa.tl