Governu Halo Esforsu Dada Kadoras Mai Timor-Leste no Hahú Produsaun iha 2031

Ministru Petróleu no Rekursu Minerál, Francisco da Costa Monteiro. Imajen/Rafa.tl

DILI, RAFA.tl– Ministru Petróleu no Rekursu Minierál (MPRM), Francisco da Costa Monteiro, hateten IX Governu Konstitusionál halo esforsu ba negosiasaun greater sunrise nian no final investment decision ne’e iha tinan 2026, hodi konstrusaun sira bele la’o ikus mai 2031 to’o 2032 bele produs ona.

Ministru Petróleu no Rekursu Minierál (MPRM), Francisco da Costa Monteiro ba jornalista sira iha Sentru Konvensaun Dili, Kinta (09/10/2025), informa IX Governu Konstitusionál halo hela esforsu lubuk ida no iha prosesu andamentu polítika governu nian ne’ebe atu dada kadoras greater sunrise  mai Timor Leste.

“Ita servisu maka’ás ba ida-ne’e, la’ós buat ida ohin hanesan ne’e halo kedas, ne’ebé ita halo hela servisu  ba iha ne’ebá,  negosiasaun sei la’o hela, ita halo estudu hela, ita hakarak ema tama final investment decision ne’e iha tinan 2026, hodi konstrusaun sira bele la’o ikus mai 2031 to’o 2032 bele produs,” Francisco da Costa Monteiro hateten.

Nia afirma Governu esforsu hela atu dada kadoras mai Timor-Lest, dadauk ne’e  loke hela oportunidade ba investidór internasional sira, ne’ebé atu vontade prepara  dezeñu ba konseitu estudu viabilidade sira.

“Pozitivu bele dada kadoras mai Timor-Leste, bele halo planta naturál likifeitu (LN, sigla inglés) nian iha Timor no bele halo refenaria, viabildiade tékniku iha, viabilidade ekonomiku iha, ita halo dadauk dezeña estudu viabilidade tanba faze primeiru iha konseitu viabilidade depois ema bolu pre-fit, dezeñu tékniku la’o buat  sira ne’e, ita sei negosia dada sira ne’ebe iha interese ita halibur para hamutuk ho ita lori buat ne’e ba oin.,” nia subliña.

Kona-bá mina iha kampu Bayu-Undan ne’ebé termina ona,  governu halo esforsu atu halo negosiasaun ho kompañia Santos hodi  haree fali saida mak viabel iha kampu Bayu-Undan.

Ministru Francisco Monteiro esplika realidade kampu Bayu-Undan ne’e,  bele dehan  karik legalemente laiha ona, joint venture mós laiha ona, tan ne’e livre atu ko’alia ho Santos no mós ko’alia ho kompañia sira seluk ne’ebe iha interese atu produs buat ne’e ba oin.

Reportajen ekipa Rafa.tl