PM Xanana Afirma Doasaun Millaun US$2.5 Ba Vitíma Inundasaun Bali Parte Husi Sentidu Fraternidade Umana

PM Xanana Gusmão (klaran) halo konférensia imprensa hafoin fila hikas husi vizita ba Londres, Reinu Unidus, iha sala VIP Aeroportu Internasionál Prezidente Nicolau Lobato, Dili, Segunda (22/09/2025). Imajen/Rafa.tl

DILI, RAFA.tl–Primeiru-Ministru (PM), Kay Rala Xanana Gusmão, afirma apóiu solidariedade ho montante orsamentu millaun US$2.5 husi Governu Timor-Leste vitíma inundasaun Bali-Indonézia parte husi sentidu fraternidade umana ne’ebé Papa Francisco hanorin hela ba povu Timor.

Primeiru-Ministru (PM), Kay Rala Xanana Gusmão ba jornalista sira iha Aeroportu Internasionál Prezidente Nicolau Lobato, Comoro, Dili, Segunda (22/09/2025), esklarese Timor-oan hotu kontente kuandu Papa Francisco mai vizita Timor-Leste, ema  rihun-resin mak ba iha Tasi-Tolu no Papa Francisco ko’alia kona-bá fraternidade umana.

Xanana hateten, la’ós primeira-vez mak Timor-Leste haruka osan ba ema ne’ebé mak terus, haruka ba fatin barak ona.

“Ita la fó tanba  rai ne’e ita-nia amigu ka la amigu,  ita fó tanba ema sira ne’ebé terus. Ita fó mós bá Morocco ida ne’ebé ita ladún hatene ho diak tanba dook loos, mas ita fó apóiu, ita la fó bá governu Morocco, ita fó bá ema sira ne’ebé presiza. Atu dehan katak fraternidade umana ne’e umanidade, ita ‘sidadaun golobal  katak ita pertense bá mundu tomak. Rai boboot iha sira iha nia sorin ne’e fó, ita mós fó netik uitoan hanesan solidariedade,” Primeiru-Ministru Kay Rala Xanana Gusmão esklarese.

Papa Francisco hanorin Timor-oan kona-bá fraternidade umana. Lae, imi hanoin katak Papa Francisco mai ne’e mak hasai foto no rein nia liman deit, maibé saida mak nia hanorin ne’e, ida-ne’e mak Timor-oan tenke hatudu.

Iha Sesta, 12 fulan-Setembru 2025, Konsellu Ministru liuhosi reuniaun estraordináriu, hato’o solidariedade bá povu, Governu Repúblika Indonézia, no autoridade provínsia Bali nian, haree bá efeitu destruidór husi inundasaun ne’ebé akontese iha illa ne’e iha loron hirak liubá. Udan boot halo mota sira nakonu no rai-halai, hodi rezulta pelumenus ema na’in-14 mate, ema barak lakon, no ema atus ba atus maka dezlokadu.

Akontesimentu sira ne’e mós kauza estragu maka’ás bá uma, estrada, ponte no infraestrutura sira seluk, no mós estragu bá atividade ekonómika lokál, inklui área sira ne’ebé iha importánsia turístika.

Iha kontestu ida-ne’e Konsellu Ministru aprova ona projetu Rezolusaun Governu nian, ne’ebé aprezenta hosi Primeiru-Ministru, Kay Rala Xanana Gusmão, ne’ebé autoriza doasaun millaun US$2.5 ba provínsia Bali, ho intensaun atu apoia esforsu asisténsia umanitária no rekuperasaun populasaun sira ne’ebé afetadu.

Reportajen ekipa Rafa.tl