PM Xanana Hatuur Fatuk-Inan Bá Konstrusaun Ospitál Andár Haat Apoiu husi Povu Japaun

Primeiru-Ministru, Kay Rala Xanana Gusmão partisipa iha serimonia hatuur fatuk-inan ba konstrusaun maternidade HNGV andár haat, Domingu (17/08/2025). Imajen/Rafa.tl

DILI, RAFA.tl-Primeiru-Ministru (PM), Kay Rala Xanana Gusmão, Domingu (17/08/2025), ofisialmente halo lansamentu hatuur fatuuk-inan ba projetu konstrusaun  maternidade, Ospitál Nasionál Guido Valadares (HNGV) ho midida andár haat.

Projetu ne’ebé apoiu finánsia husi Governu Japaun liuhosi sira-nia Ajénsia Japonesa ba Kooperasaun Internasionál (JICA) iha Timor-Leste ho total orsamentu millaun $20.

Edifísiu  maternidade HNGV andár haat ne’e iha sala hamutuk 77 ne’ebé atu konstrui husi empreza Wakachiku Construction Co., Ltd  ho empreza konsultoria  Oriental Consultants Global Co., Ltd, ne’ebé tuir kontatu sei termina iha fulan-Abríl 2027.

Lansamentu projetu ospitál andár haat ne’e  akompaña husi Ministru Saúde, Élia  A.A dos Reis Amaral, Embaixadór Japaun mai Timor-Leste, Tetsuya Kimura,  reprezentante JICA iha Timor-Leste, Daisuke Fukumori ho mós konvidade onra sira seluk.

Primeiru-Ministru, Kay Rala Xanana Gusmão,  hato’o agradese u’ain ba apoiu povu Japaun nian mai povu Timor-Leste ne’ebé harii tan edifísiu maternidade ne’ebé kompleta ho fasilidade moderna sira.

“Ida ne’e nu’udár faze ida ba dezenvolvimentu servisu ospitál nian oinsá fó atendimentu saúde ne’ebé di’ak liu  ba povu,” Xanana Gusmão hateten.

Xefe Governu ne’e hateten, apoia ida ne’e atu reforsa kooperasaun povu Japaun nian ba Timor-Leste, liuliu iha área saúde, oinsá fó hodi mellora servisu saúde ba povu, nune’e, bele hetan assistensia saúde ne’ebé di’ak liután.

Xanana hateten, setór saúde nu’udár setór ne’ebé importante tebes ba ema tanba ne’e ho apoiu ida ne’e ba futuru bele mellora atendimentu  ba povu ho diak bainhira povu hakarak halo tratamentu.

Ministra Saúde Élia A.A dos Reis Amaral, hateten  projetu konstrusaun maternidade HNGV andár haat ne’e apoia gratutui husi povu Japaun mai povu Timor-Leste. Nune’e, lori Gorvenu nian naran, Ministra Élia Amaral kongratula povu Japaun ba apoiu importante ida-ne’e.

“Japaun no Timor-Leste nu’udár nasaun amigu ne’ebé halo relasaun di’ak to’o ohin loron, ha’u agradesimentu sériu ba povu Japaun ne’ebé apoia tebes Timor-Leste iha área  saúde nian,” Ministru Élia Amaral hateten ba jornalista sira.

Iha fatin hanesan, Embaixadór Japaun ba Timor-Leste, Tetsuya Kimura dehan ne’e onra boot ba nia  atu bele tuir serimónia lansamentu hatuur fatuk-inan ba projetu konstrusaun maternidade andár haat HNGV nian ne’e.

“Importánsia ba apoiu Timor-Leste nia setór saúde iha aliñamentu ho ita-boot sira-nia politika nasionál ba prestasaun kuidadu saúde primáriu ho kualidade aas no servisu médiku ba sidadaun hotu-hotu,” Embaixadór Japaun ba Timor-Leste, Tetsuya Kimura hateten.

Bainhira Timor-Leste  prepara  nia adezaun formál ba ASEAN iha fulan Outubru 2025,  tuir Embaixadór Tetsuya Kimura, hadi’a asesu ba kuidadu médiku ho kualidade sai importante liu tan.

Nia dehan, durante tinan sanulu liubá, Japaun fò apoiu liu millaun $80 ba setór saúde Timor-Leste nian.

“Ami nia inisiativa sira ne’ebé la’o hela, inklui harii no hadi’a fasilidade emerjénsia obstétriku no kuidadu neonatal hamutuk 20 iha munisípiu 12, estabelese postu saúde iha área remota sira, fornese ambulánsia, no oferese formasaun médiku ho bolsa estudu ba ofisiál sira Ministériu Saúde nian,”  Embaixadór Japaun mai Timor-Leste ne’e informa.

Reprezentante JICA iha Timor-Leste, Daisuke Fukumori hateten, Ajénsia Kooperasaun Internasionál Japaun nian (JICA) asina akordu subsídiu nian ho Governu Repúblika Demokrátika Timor-Leste nian iha loron 20 fulan-Agostu tinan 2024, hodi fornese ajuda subvensaun nian to’o billaun  3.093 yen (purvolta millaun US$20) ba projetu ba hadi’a HNGV.

Reprezenta JICA dehan, objetivu husi projetu ne’e mak atu hametin kapasidade prestasaun servisu no hasa’e kualidade servisu médiku husi HNGV, ne’ebé sai hanesan  úniku ospitál nível tersiáriu iha nasaun ne’e, liuhusi konstrusaun instalasaun sira no fornesimentu ekipamentu médiku relasionadu, nune’e kontribui ba hadi’a sistema saúde iha Timor-Leste.

Nia hatutan, projetu ne’e inklui konstrusaun edifisiu foun ho andár haat ba departamentu ambulatóriu, sala operasaun sira, Departamentu Fornesimentu Esteril Sentrál (CSSD), Departamentu Traballu kompromisu Ministériu Saúde nian.

Ekipa Reportajen Rafa.tl