Família Tenke Hametin Edukasaun Bázika iha Uma-Laran Hanesan Aliserse Bá Valór Morál

Joventude Katólika, Natalino de Jésus Dias. Imajen/Rafa.tl

DILI, RAFA.tl– Família mak mahon no fatin dahuluk ba ema atu aprende, tanba ne’e, tenke hametin edukasaun bázika iha uma-laran hanesan aliserse ba valór morál hodi prevene degradasaun morál iha família no sosiedade.

Notísia Relevante: Estudante Tenke Aproveita Oportunidade Estuda Labele Sai Atan Bá Telemovel

Degradasaun morál refere ba redusaun ka estragu iha padraun morál, ka hahalok individuu nian ka grupu ida nian, ne’ebé la fó vantajen ba sosiedade.

Konsekuensia husi degradasaun moral, bele inklui estabilidade sosial, lakon konfiansa no impaktu negativu  ba moris  diak komunidade nian.

Joventude Katólika, Natalino de Jésus Dias hateten, ko’alia kona-bá degradasaun moral, hanesan ema Katolika ida, presiza mós define kona-bá lei natural no doutrina sira igreja nian no mós tradisaun ka kultura ne’ebé iha, tanba pontu hirak ne’e maka sai hanesan sasukat ka tulun ema atu sai diak.

Kauza ba degradasaun morál iha Timor-Leste, fatór ida mós mak sirkulu ambiente sosiedade ka komunidade nian, iha fatin sira ne’ebé ema aprende ba ka iha eskola, iha grupu komunitáriu no organizasaun,  ema la tau ona importánsia ba valor sira ne’ebé halo ema sivilizadu no iha integridade hanesan ema ne’ebé hola ilas lolos husi Kriador, nune’e ikus mai mosu degradasaun morál.

“Se ita ko’alia kona-bá degradasaun moral iha Timor-Leste, ita haree ba nivel ida ne’ebé, kaman, todan ka extremu liu. Haree ba istória, ita liu husi etapa sira ne’e hotu, se ita haree ohin loron degrasaun moral ne’e akontese, bainhira iha uma laran rasik, iha sosiedade, iha grupu sira iha eskola, ita sukat husi ne’ebé?, se sukat ho ukun-fuan sanulu,  se ita kontra deit ida, degradasaun moral ne’e akontese kedas,” Natalino de Jesus esplika.

Foin-sa’e ne’e hatutan hanesan sarani Katólika presiza mós hakruk ba doutrina ka ukun-fuan sira kreda Katólika nian ne’ebé sai hanesan regulamentu ka lei, ne’ebé ema sei kumpre no halo tuir durante moris tomak hanesan sarani kristaun Katólika.

Natalino argumenta katak ohin loron degradasaun iha Timor-Leste buras tanba maioria kontinua Pratika asaun sira hanesan utilija linguajen la apropriadu, violensia kontinua eziste, korupsaun no mos asuntu sosial sira seluk, ne’ebé konsidera fo valor negativu ba ema hotu nia hakarak.

“Ohin loron ita bele dehan katak degradasaun moral ne’e akontese ba foin-sa’e sira ka ita-nia estudante sira, sosiedade lakon figura ka role model, ka ema sira ne’ebé sai hanesan lalenok ba ema seluk. Estudante ka foin-sa’e sira abitua ho hahalok la di’ak. Tanba ne’e eskola nia papel, inan-aman nia responsabilidade,  tenke tulun foin-sa’e sira moris iha dalan loos,”  Natalino de Jesus esplika.

Ikus liu Foin-sa’e ne’e hameno ba sosiedade Timor-Leste, liu-liu ba estudante no Foin-sa’e sira, atu hatene kumpre lei ka regulamentu sira iha uma no eskola inklui fatin ne’ebé deit sira aprende ba.

Ba inan no aman sira, kontinua hametin edukasaun bázika iha família, no sai matadalan ba oan sira, iha komunikasaun intensivu, no hodi hadook oan sira husi hahalo ne’ebé desvia sira husi dalan loos.

Reportajen ekipa Rafa.tl