30 Agostu 1999, Povu ho Korazen Tebes Enfrenta Mate Vota Ba Ukun Aan

Povu ba vota iha konsulta populár 30 Agostu 1999 hodi determina Timor-Leste nia independénsia. Imajen/Dok.

Díli, 27 Agostu 2026 (RAFA)- Primeiru-Ministru, Kay Rala Xanana Gusmão hateten, iha loron 30 fulan-Agostu 1999, povu ho korazen tebe-tebes no reziste hasoru violénsia, fo aan ba mate hodi vota ukun aan.

Xefe Governu hatoo deklarasaun ne´e ba jornalista sira iha iha Minsiteriu Finansas, Kuarta-ne’e, hodi fó hanoin ba povu hotu kona-bá tinan ida tan selebrasaun loron Konsulta Populár ne’ebé nakonu ho korajen, sakrifisiu, domin no esperansa independensia nian.

“Iha 30 Agostu 1999, povu ho korazen tebe-tebes liuhosi rezilensia maka’ás hasoru violénsia, hasoru mate, hodi ba vota ita nia ukun aan,” Primeiru-Ministru Xanana Gusmão hateten.

Xanana Gusmão dehan  tinan 24 liu tiha hetan restaurasaun ba ukun aan, sei iha prosesu hadia nafatin instituisaun Estadu nian. Nune’e, bele responde ba mehi povu nian iha tinan 24 ne’ebé nakonu ho terus, mas la hakiduk hodi hetan ukun aan.

“Ita bele dehan povu  terus ba ukun aan, la’ós atu hetan bandeira ida, la’ós atu hetan inu nasionál ida, la’ós atu hetan Prezidente, Governu, Parlamentu, Tribunál, maibé atu oinsá Estadu ne’e haka’ás aan deside hamenus terus ohin loron nian mós,” Xanana hateten.

Primeiru-Ministru husu ba povu hotu atu iha Domingo mai ne’e, iha loron 30 Agostu, ba joven sira sira, ba konvidadu tomak, hotu-hotu hanoin nétik ba, liu-liu joven sira, hanoin katak, buat sira ne’e alkansa agora, la’ós governu ida ne’e nia hahalok. Buat ne’ebé alkansa agora rezultadu mai husi povu nia terus, povu nia mate mak hetan fundu petroleu bele uza ba rai.

Tamba ne’e, Xefe Governu husu hotu atu halo reflesaun ba hahalok sira, hodi kontribui ba hadia nafatin sosiadade ne’e atu kontinua moris iha dame nia laran.

” Ita ohin ne’e oportunidade di’ak, Domingu 30 Agostu, ne’e mak husu ba ita hotu, membru governu, liu-liu ba Prezidente Autoridade Munisipál sira atu kontinua nafatin servisu hamutuk ho komunidade, joven sira hadomi imi nia rain ba,” Xefe ezekutiva hateten.

Tuir ajenda ofisiál husi Governu liuhosi Ministeriu Administrasaun Estata (MAE), komemorasaun loron 30 Agostu ba dala-27 (30 Agostu 1999-2026) sei realiza iha Munisípiu Manatuto.

Jornalista: Cristina Ximenes