Ouvir RAFA Ritmo, Voz e Coração de Timor
Díli, 6 Outubru 2026 (RAFA) —Ministériu Komérsiu no Indústria (MCI) planeia reabilita Merkadu Munisipál Taibessi ho Manleuana iha tinan 2027.
Ministru Komérsiu no Indústria, Filipus Nino Pereira ba jornalista sira, Tersa ne’e, iha Díli, hateten ministériu halo ona levantamentu dadus no estudu viabilidade kona-bá kondisaun merkadu munisipál rua ne’e.
“Agora ita hein deit faze final, Detail Engineering Design, atu bele hahú konstrusaun. Espera katak tinan oin, ita bele hahú konstrusaun fízika ba merkadu rua ne’e,” Ministru Nino Pereira afirma.
Governante ne’e hatutan, durante tinan 2024 no 2025, MCI halo manutensaun ba Merkadu Taibessi no Manleuana. Maibé, tuir nia, kondisaun merkadu rua ne’e seidauk sufisiente atu responde ba nesesidade negosiante sira. Tanba, númeru vendedor no negosiante aumenta, enkuantu espasu atu fa’an produtu limitadu.
Ministru ne’e mós relata problema seluk vendedor sira ne’ebé lubuk ida hela no fa’an sasan iha fatin sira ne’ebé la apropriadu iha área kapital Díli.
Nino Pereira afirma atu garante atividade komérsiu kontinua durante prosesu konstrusaun, MCI sei koordena ho Autoridade Munisípiu Díli (AMD) no Sekretaria Estadu Asuntu Toponímia no Organizasaun Urbana (SEATOU).
Tuir nia, Governu sei identifika fatin provizóriu ida atu akomoda vendedor sira durante konstrusaun merkadu rua ne’e.
“Ita sei identifika no koordena atu fasilita sira durante prosesu konstrusaun, hodi bele kontinua sira-nia atividade negosiu. Ezemplu, ami halo ona iha Baucau no Lautém. Bainhira ami hahú konstrusaun, ami mos prepara kondisaun provizóriu ba vendedor sira,” Nino Pereira haktuir.
Kona-bá orsamentu ba konstrusaun merkadu rua ne’e, Ministru Nino Pereira afirma Governu seidauk bele anunsia montante definitivu tanba presiza hein kalkulasaun final husi DED.
Nia hateten kona-bá orsamentu ba konstrusaun merkadu rua ne’e sei uza Fundu Infraestrutura.
Bazeia ba dadus Progresu Fundu Infraestrutura ne’ebé RAFA asesu, estudu viabilidade ba Merkadu Munisipál Taibessi no Manleuana hala’o husi konsórsiu PT Multi Karadiguna Jasa jv Salu Corporation Unipessoal, Lda. no PT Laminar Engineering Consultant no mos PT Metafora Consultans jv Areplen Consultor Unipessoal Lda.
Estudu ne’e iha progresu 95 porsentu no tama ona prosesu final ho valór baze ka baze amount ba atividade estudu viabilidade ho montante US$241,033 no orsamentu ba merkadu Manleuana US$215.178.08.
Dokumentu ne’e mós hatudu katak estudu viabilidade finaliza ona no agora hein relatóriu tékniku atu halo aprovasaun husi KAFI molok tama ba prosesu tenderizasaun no dezeñu konstrusaun.
Jornalista: Remigia Locatell
Written by: RafaFM
2027 Governu Reabilita Merkadu Taibessi ho Manleuana
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt